കുറിയർ വഴി ലക്ഷങ്ങളുടെ രാസലഹരി കടത്തി; അങ്കമാലിയിൽ യുവാവ് പിടിയിൽ

അങ്കമാലി ∙ കുറിയർ വഴി ലക്ഷങ്ങളുടെ രാസലഹരി മരുന്നു കടത്തിയെന്ന കേസിൽ യുവാവ് അറസ്റ്റിൽ. ചെങ്ങമനാട് പനയക്കടവ് പാലത്തിനു സമീപം നീലത്ത് പള്ളത്ത് അജ്മലിനെയാണ് (24) പൊലീസ് അറസ്റ്റ് ചെയ്തത്. 200 ഗ്രാം രാസലഹരി മരുന്ന്, 3.89 ഗ്രാം ഓയിൽ രൂപത്തിലുള്ള ലഹരിമരുന്ന്, മൂന്ന് എൽഎസ്ഡി സ്റ്റാംപ് എന്നിവയാണ് കുറിയർ വഴി ഇയാൾക്കായി വന്നത്. ബ്ലൂടൂത്ത് സ്പീക്കറിനുള്ളിൽ വച്ചാണ് മരുന്നു കടത്തിയത്. ഏകദേശം 20 ലക്ഷം രൂപ വില വരുന്ന മരുന്നാണ് എത്തിച്ചത്. മുംബൈയിൽ നിന്നു രാഹുൽ എന്നയാളുടെ വിലാസത്തിലാണ് ലഹരിമരുന്ന് കേരളത്തിലെത്തിയത്. അജ്മൽ അങ്കമാലിയിലെ കുറിയർ സ്ഥാപനത്തിൽനിന്ന് കുറിയർ കൈപ്പറ്റി മടങ്ങുമ്പോൾ പൊലീസിനു ലഭിച്ച രഹസ്യ വിവരത്തെ തുടർന്നു പിടികൂടുകയായിരുന്നു. ചെങ്ങമനാട് സ്റ്റേഷനിലെ റൗഡി പട്ടികയിൽ ഉൾപ്പെട്ടയാളാണ് അജ്മൽ എന്നു പൊലീസ് പറഞ്ഞു. അങ്കമാലി എസ്എച്ച്ഒ പി.എം.ബൈജു, ഉദ്യോഗസ്ഥരായ എൽദോ പോൾ, മാർട്ടിൻ ജോൺ, റെജിമോൻ തുടങ്ങിയവരാണ് അന്വേഷണ സംഘത്തിലുണ്ടായിരുന്നത്. കഴിഞ്ഞ ദിവസം കോട്ടപ്പടി ആലങ്ങാട് റോഡിൽ ആയുർവേദ മരുന്നു കടയ്ക്കു സമീപത്തുനിന്ന് 20 ലക്ഷം രൂപ വിലവരുന്ന രാസ ലഹരിമരുന്ന് എറണാകുളം പൊലീസിന്റെ പ്രത്യേക അന്വേഷണ സംഘം പിടികൂടിയിരുന്നു. ബെംഗളൂരുവിൽനിന്നു കാറിൽ ലഹരിമരുന്ന കടത്തുകയായിരുന്ന സംഘത്തിൽ നിന്നാണ് ലഹരി പിടികൂടിയത്. എറണാകുളം ജില്ലാ റൂറൽ മേഖലയിൽ ലഹരിക്കെതിരെ കടുത്ത നടപടികൾ സ്വീകരിച്ചു വരുന്നതായി ജില്ലാ പൊലീസ് മേധാവി വിവേക് കുമാർ പറഞ്ഞു.