പയ്യോളിയിൽ കാർ യാത്രക്കാരെ തട്ടിക്കൊണ്ടു പോയി ആക്രമിച്ചു; പൊലീസ് കേസെടുത്തു

കോഴിക്കോട് പയ്യോളിയില്‍ കാര്‍ യാത്രക്കാരെ തട്ടിക്കൊണ്ടുപോയതായി പരാതി. കാര്‍ തടഞ്ഞുനിര്‍ത്തുകയും ചില്ല് തകര്‍ക്കുകയും ചെയ്തതായും അക്രമത്തിനിരയായവർ പറയുന്നു. കാറിലുണ്ടായിരുന്ന മലപ്പുറം വേങ്ങര സ്വദേശി വിഷ്ണുവിനെ തോക്കുകൊണ്ട് തലയ്ക്കടിച്ച് പരുക്കേല്‍പിച്ചു. കാർ പരിശോധിച്ച ശേഷം ഇവരെ വിട്ടയച്ചെന്നും പരാതിക്കാർ പറയുന്നു. ആളു മാറിയുണ്ടായ ആക്രമണമാണെന്നാണ് പൊലീസിന്റെ നിഗമനം. സംഭവത്തിൽ കേസെടുത്തു. ഇന്നലെ അർധരാത്രി പയ്യോളി ദേശീയപാതയിലാണ് സംഭവമുണ്ടായത്. കാർ യാത്രികരായ നാലു പേരെ മറ്റൊരു കാറിലെത്തിയ സംഘമാണ് തടഞ്ഞുനിർത്തി അതിക്രമം കാട്ടിയത്. ഇവരെ പയ്യോളിയിൽനിന്ന് മുഴുകുന്ന് ഭാഗത്തേക്ക് തട്ടിക്കൊണ്ടു പോകുകയായിരുന്നു. കാർ ഓടിച്ചിരുന്ന മലപ്പുറം വേങ്ങര സ്വദേശിയായ വിഷ്ണുവിനെ അവിടെവച്ച് തോക്കുകൊണ്ട് തലയ്ക്കടിക്കുകയും ഭീഷണിപ്പെടുത്തുകയും ചെയ്തു. തുടർന്ന് ഇവർ സഞ്ചരിച്ചിരുന്ന ഇന്നോവ കാർ പരിശോധിച്ചു. അതിനുശേഷമാണ് അക്രമികൾ ഇവരെ ഉപേക്ഷിച്ച് അവിടെനിന്ന് കടന്നുകളഞ്ഞത്. സംഭവത്തെക്കുറിച്ച് വിഷ്ണുവും ഒപ്പമുണ്ടായിരുന്ന മൂന്നു പേരും പയ്യോളി സ്റ്റേഷനിൽ പരാതി നൽകിയിട്ടുണ്ട്. അക്രമി സംഘം ആളുമാറി തട്ടിക്കൊണ്ടു പോകാൻ ശ്രമിച്ചതാകാമെന്നാണ് പൊലീസിന്റെ പ്രാഥമിക നിഗമനം. ആക്രമണത്തിന് സ്വർണക്കടത്തുമായി ബന്ധമുണ്ടോ എന്ന കാര്യവും പരിശോധിക്കുന്നുണ്ട്.