കുറിഞ്ഞിയില്‍ കെ.എസ്‌.ആര്‍.ടി.സി. ബസും കാറും കൂട്ടിയിടിച്ചു നിരവധി പേര്‍ക്കു പരുക്ക്‌

കുറിഞ്ഞിയില്‍ കെ.എസ്‌.ആര്‍.ടി.സി. ബസും കാറും കൂട്ടിയിടിച്ചു നിരവധി പേര്‍ക്കു പരുക്ക്‌. ഇന്നലെ രാവിലെ എട്ടിനായിരുന്നു അപകടം. റാന്നി സ്വദേശിയായ കാര്‍ ഡ്രൈവര്‍ മാക്കപ്പുഴ തെക്കേച്ചെരുവില്‍ മുകേഷി(31)നെ ഗുരുതര പരുക്കുകളോടെ കോട്ടയം മെഡിക്കല്‍ കോളജ്‌ ആശുപത്രിയിലും, സൈലോയിലുണ്ടായിരുന്ന മറ്റൊരു യാത്രക്കാരനായ കുളത്തുങ്കല്‍ ഏബ്രാഹം ജോര്‍ജിനെ തൊടുപുഴ സ്വകാര്യ ആശുപത്രിയിലും പ്രവേശിപ്പിച്ചു. ബസ്‌ യാത്രക്കാരായ 18 പേര്‍ നിസാര പരുക്കുകളോടെ തൊടുപുഴയിലെ സ്വകാര്യ ആശുപത്രിയില്‍ ചികിത്സ തേടിയിരുന്നു. ഇടുക്കി കഞ്ഞിക്കുഴി സ്വദേശിയായ ആനന്ദഭവനില്‍ മേഴ്‌സി(60), ചെറുതോണി തോണിശേരിയില്‍ അഞ്ചു(38), ഇടുക്കി സ്വദേശി ജയകുമാരി(49) എന്നിവര്‍ തൊടുപുഴ താലൂക്ക്‌ ആശുപത്രിയിലും ചികിത്സയിലാണ്‌.

കട്ടപ്പനയില്‍ നിന്നും തിരുവനന്തപുരത്തേയ്‌ക്ക്‌ പോവുകയായിരുന്ന കെ.എസ്‌.ആര്‍.ടി.സി. ബസ്‌ രാമപുരം റോഡില്‍ നിന്നും തൊടുപുഴ റോഡിലേയ്‌ക്കു പ്രവേശിച്ച ഓള്‍ട്ടോ കാറില്‍ ഇടിച്ചതിനുശേഷം പാലായില്‍നിന്നും വരികയായിരുന്ന സൈലോ കാറിനെ ഇടിച്ചു തെറിപ്പിക്കുകയായിരുന്നു.