പള്‍സര്‍ സുനിയെ ദിലീപിന് പരിചയപ്പെടുത്തിയത് മുതിര്‍ന്ന നടന്‍

നടിയെ ആക്രമിച്ച കേസില്‍ ദിലീപിനു പുറമേ അന്വേഷണം കൂടുതല്‍ താരങ്ങളിലേയ്‌ക്കെന്ന് സൂചന. 2012ന് മുന്‍പ് ദിലീപും പള്‍സര്‍ സുനിയും തമ്മില്‍ യാതൊരു ബന്ധവുമില്ലായിരുന്നെന്ന സൂചനയുടെ അടിസ്ഥാനത്തിലാണിത്. അന്ന് അത്തരത്തില്‍ ക്വട്ടേഷന്‍ ഏല്‍പ്പിക്കണമെങ്കില്‍ സുനിയെ വിശ്വാസമുള്ള ഒരാളായിരിക്കും ദിലീപിന് പരിചയപ്പെടുത്തി കൊടുത്തിട്ടുള്ളതെന്ന വിശ്വാസത്തിലാണ് പോലീസ്. ഇതോടെ സുനിയുമായി പരിചയമുണ്ടായിരുന്ന മുതിര്‍ന്ന നടനേയും നിരീക്ഷിക്കാനാണ് പൊലീസ് നീക്കമെന്നാണ് പുറത്ത് വരുന്ന റിപ്പോര്‍ട്ടുകള്‍.

ഇതിനു മുന്‍പും സുനി ഇത്തരത്തിലുള്ള ക്രിമിനല്‍ കുറ്റങ്ങള്‍ ചെയ്തിട്ടുണ്ടെന്നുറപ്പുള്ള ഒരാളാകാം പരിചയപ്പെടുത്തി കൊടുത്തിട്ടുള്ളത്. കുറ്റകൃത്യം നടന്ന ഫെബ്രുവരി 17ന് രാത്രി നിര്‍മ്മാതാവ് ആന്റോ ജോസഫ് ഉള്‍പ്പെടെയുള്ളവര്‍ വിളിച്ചിട്ടും ദിലീപ് ഫോണ്‍ എടുത്തില്ല. എന്നാല്‍ മുതിര്‍ന്ന നടന്റെ കോള്‍ മാത്രം നാലു തവണ എടുത്തു. നടിക്കെതിരായ ആക്രമണത്തെക്കുറിച്ച് വ്യക്തമായ അറിവ് ഇയാള്‍ക്കുണ്ടായിരുന്നെന്ന് പോലീസ് സംശയിക്കുന്നു.സംഭവത്തിന് മുന്‍പും ശേഷവും ഈ നടനും ദിലീപുമായുള്ള ആശയ വിനിമയത്തിന്റെ സൂചനകളും പോലീസിന് ലഭിച്ചിട്ടുണ്ട്. അമ്മ സംഘടനയുടെ യോഗം നടന്ന വേദിയിലും ദിലീപിന് പിന്തുണയുമായി ഈ നടനുണ്ടായിരുന്നു.