ചിട്ടിയുടമ കോടികളുമായി മുങ്ങി ; പ്രതിഷേധവുമായി മുന്നൂറോളം പേര്‍

നിക്ഷേപകരില്‍ നിന്നും കോടിക്കണക്കിന് രൂപ വാങ്ങി ധനകാര്യ സ്ഥാപനത്തിന്റെ ബ്രാഞ്ചുകള്‍ പൂട്ടി ചിട്ടിയുടമകള്‍ മുങ്ങി. കുറിച്ചിട്ടിയും നിക്ഷേപവുമായി ഒന്നു മുതല്‍ എട്ടുലക്ഷം രൂപവരെ നഷ്ടമായവര്‍ പരാതിയുമായി പോലീസിനെ സമീപിച്ചു. എറണാകുളം, തൃശൂര്‍, കൊല്ലം ജില്ലകളില്‍ തീരപ്രദേശങ്ങളിലായി പ്രവര്‍ത്തിക്കുന്ന തത്ത്വമസിയുടെ സ്ഥാപനങ്ങളാണ് പൂട്ടി കിടക്കുന്നത്.

പ്രതിഷേധവുമായി മുന്നൂറോളം പേര്‍ രംഗത്തെത്തി. പലര്‍ക്കും നഷ്ടമായിരിക്കുന്നത് ലക്ഷങ്ങളാണ്. പോലീസ് അന്വേഷണം തുടങ്ങി. നൂറു കോടി രൂപയുടെ തട്ടിപ്പ് നടന്നതായിട്ടാണ് സൂചന. ഉടമയുടെ ഫോണ്‍ സ്വിച്ച് ഓഫ് ആണ്. ഓരോ ശാഖയിലും വനിതകളെ ആകര്‍ഷകമായ ശമ്പളവും കളക്ഷന്‍ കമ്മീഷന്‍ ബത്തയും നല്‍കിയാണ് പണം പിരിക്കാന്‍ നിയോഗിച്ചിരുന്നത്.