ഗൂഢസംഘങ്ങളെ ഇല്ലാതാക്കണം

  കൊച്ചി: ചലച്ചിത്ര മേഖലയില്‍ ഗൂഢസംഘങ്ങള്‍ പ്രവര്‍ത്തിക്കുന്നുണ്ടെങ്കില്‍ അതിനെ ഇല്ലായ്മ ചെയ്യണമെന്ന് ഫെഫ്ക ജനറല്‍ സെക്രട്ടറി ബി ഉണ്ണികൃഷ്ണന്‍ വ്യക്തമാക്കി. ഫെഫ്ക പ്രൊഡക്ഷന്‍ എക്സിക്യൂട്ടീവ് യൂണിയന്‍ ജനറല്‍ സെക്രട്ടറിക്ക് കൊടുത്ത കത്തിലാണ് നിലപാട് വ്യക്തമാക്കിയിരിക്കുന്നത്.   നടന്‍ നീരജ് മാധവന്‍ താരസംഘടനയക്ക് നല്കിയ വിശദീകരണത്തില്‍ നിലപാട് ആവര്‍ത്തിച്ച സാഹചര്യത്തിലാണിത് ഫെഫ്കയുടെ നിലപാട് പുറത്തു വന്നത്. തൊഴില്‍ പരമായ എല്ലാ സംരക്ഷണവും സംഘടന നല്‍കണം. സിനിമാ മേഖലയില്‍ ഏതെങ്കിലും മാഫിയ കടന്നു കൂടിയിട്ടുണ്ടെങ്കില്‍ അതിനെ ചെറുക്കണമെന്നും മലയാള സിനിമയില്‍ ഒരു അംഗത്തിന് പോലും വിവേചനം നേരിടേണ്ടി വരാന്‍ പാടില്ല.   നടന്‍ നീരജ് മാധവന്‍ നടത്തിയ പരാമര്‍ശങ്ങള്‍ ഗൗരവമായി എടുക്കേണ്ടതാണ്. പ്രത്യേകിച്ചും അയാള്‍ സംഘടനയായ അമ്മയ്ക്ക് നല്‍കിയ വിശദീകരണത്തിലും നിലപാട് ആവര്‍ത്തിക്കുന്ന സാഹചര്യത്തില്‍. അതുകൊണ്ട് പരാതി സംബന്ധിച്ച് പരിശോധന നടത്തണമെന്ന് ഫെഫ്ക ജനറല്‍ സെക്രട്ടറി ബി ഉണ്ണികൃഷ്ണന്‍ നല്‍കിയ കത്തിലാവശ്യപ്പെട്ടു.   നീരജ് മാധവന്‍ നല്‍കിയ വിശദീകരണം താര സംഘടനയായ അമ്മ ഔദ്യോഗികമായി ഫെഫ്കയ്ക്ക് കൈമാറി. സിനിമയില്‍ വളര്‍ന്നുവരുന്നവരെ ഇല്ലാതാക്കുന്ന സംഘം ഉണ്ടെന്ന ഫെയ്സ്ബുക്ക് പരാമര്‍ശത്തിലാണ് മറുപടി . ആരുടേയും പേര് പാരാമര്‍ശിക്കുന്നില്ലെങ്കിലും തന്റെ നിലപാട് നീരജ് മാധവന്‍ കത്തില്‍ ആവര്‍ത്തിക്കുന്നുണ്ട്. ഫെഫ്കയുടെ ആവശ്യപ്രകാരമായിരുന്നു അമ്മ നീരജ് മാധവിനോട് വിശദീകരണം ആവശ്യപ്പെട്ടത്.   നീരജിന്റെ മറുപടി ലഭിച്ച സാഹചര്യത്തില്‍ ഫെഫ്കയിലെ മറ്റു യൂണിയനുകള്‍ ഈ വിഷയത്തില്‍ തുറന്ന ചര്‍ച്ച നടത്തണമെന്നും ബി. ഉണ്ണകൃഷ്ണന്‍ നല്‍കിയ കത്തില്‍ ചൂണ്ടിക്കാട്ടി