സയനഡ് സിനിമ വരുന്നു

ഇരുപതിലധികം യുവതികളെ കൊലപ്പെടുത്തിയ സീരിയല്‍ കില്ലര്‍ സയനൈഡ് മോഹനന്റെ ജീവിതം സിനിമയാകുന്നു. നിര്‍ധനരായ യുവതികളെ സ്‌നേഹം നടിച്ച് സുഹൃത്തുക്കളാക്കും. പിന്നീട് വിവാഹ വാഗ്ദാനം നല്‍കി പലയിടത്തും കൊണ്ടുപോയി ലൈംഗിക ബന്ധത്തിലേര്‍പ്പെടും. അതിന് ശേഷം ഗര്‍ഭനിരോധന ഗുളികകള്‍ എന്ന് പറഞ്ഞ് സയനൈഡ് പുരട്ടിയ ഗുളികകള്‍ നല്‍കി അവരെ കൊലപ്പെടുത്തും. കൊലപാതകത്തിനുശേഷം അവരുടെ ആഭരണങ്ങളും മോഷ്ടിക്കും. ഇതായിരുന്നു മോഹനന്റെ രീതികള്‍.മലയാളിയും ദേശീയ അവാര്‍ഡ് ജോതാവുമായ സംവിധായകന്‍ രാജേഷ് ടച്ച്‌റിവര്‍ ആണ് 'സയനൈഡ്' എന്ന പേരില്‍ സിനിമ ഒരുക്കുന്നത്. തെലുങ്ക്, മലയാളം, തമിഴ്, ഹിന്ദി, കന്നഡ, മലയാളം എന്നീ ഭാഷകളില്‍ പ്രവാസി വ്യവസായി പ്രദീപ് നാരായണനാണ് ചിത്രം നിര്‍മിക്കുന്നത്. തെന്നിന്ത്യയിലെ പ്രമുഖ താരങ്ങള്‍ അഭിനയിക്കും. ബംഗളൂരു, മംഗളൂരു, കൂര്‍ഗ്, മഡിക്കേരി, ഗോവ, ഹൈദരാബാദ്, കാസര്‍ഗോഡ് എന്നിവിടങ്ങളില്‍ ചിത്രീകരണം നടക്കുമെന്ന് സംവിധായകന്‍ രാജേഷ് പറഞ്ഞു. രാജേഷ് ടച്ച് റിവര്‍ തന്നെയാണ് ചിത്രത്തിന്റെ കഥയും തിരക്കഥയും ഒരുക്കുന്നത്. വിശ്വരൂപം, ഉത്തമ വില്ലന്‍ തുടങ്ങിയ ചിത്രങ്ങളില്‍ കമല്‍ ഹാസനോടൊപ്പം പ്രവര്‍ത്തിച്ച സദാത് സൈനുദ്ദീനാണ് ഈ ചിത്രത്തിന്റെ ഛായാഗ്രാഹകന്‍. പത്മശ്രീ അവാര്‍ഡ് ജേതാവ് സുനിത കൃഷ്ണനാണ് ഉപദേഷ്ടാവ്. ബോളിവുഡ് സംഗീത സംവിധായകന്‍ ജോര്‍ജ്ജ് ജോസഫ് സംഗീതം പകരും.