മമ്മൂട്ടി കൈ വിട്ട ഹിറ്റുകള്‍

മമ്മൂട്ടിയുടെ കൈയില്‍ നിന്നും വഴുതിപ്പോയ ചില മെഗാഹിറ്റുകളുണ്ട്. ഏറ്റവും കൂടുതല്‍ വിജയിച്ച ചിത്രങ്ങള്‍ ഒഴിവാക്കിയ നടനും മമ്മൂട്ടിയാണ്. മെഗാസ്റ്റാര്‍ ഒഴിവാക്കിയ മിക്ക ചിത്രങ്ങളും പിന്നീട് ചെയ്തത് മോഹന്‍ലാല്‍ ആണ്. 1986-ല്‍ പുറത്തിറങ്ങിയ രാജാവിന്റെ മകന്‍ എന്ന ചിത്രത്തിന് വേണ്ടി മമ്മൂട്ടിയെയായിരുന്നു ആദ്യം പരിഗണിച്ചത്. എന്നാല്‍ ചിത്രം പിന്നീട് മോഹന്‍ലാലിനെ തേടിയെത്തി. പ്രേക്ഷകര്‍ ഇന്നും നെഞ്ചിലേറ്റിയിരിക്കുന്ന വിന്‍സന്റ് ഗോമസ് എന്ന കഥാപാത്രം മോഹന്‍ലാലിന്റെ കരിയര്‍ തന്നെ മാറ്റിമറിച്ചു. ഷാജി കൈലാസ്-രണ്‍ജി പണിക്കര്‍ ടീമിന്റെ 'ഏകലവ്യന്‍' എന്ന സിനിമയിലെ മാധവന്‍ ഐപിഎസ് എന്ന കഥാപാത്രമായി ആദ്യം തീരുമാനിച്ചത് മമ്മൂട്ടിയെയായിരുന്നു. എന്നാല്‍ ചില കാരണങ്ങളാല്‍ മമ്മൂട്ടി ആ കഥാപാത്രത്തെ അവതരിപ്പിക്കാന്‍ തയാറായില്ല. പിന്നീട് സുരേഷ് ഗോപിയുടെ തീപ്പൊരി ഡയലോഗില്‍ ചിത്രം സൂപ്പര്‍ ഹിറ്റുകളിലൊന്നായി. 'ഇരുവര്‍' എന്ന സിനിമയില്‍ പ്രകാശ് രാജ് അവതരിപ്പിച്ച തമിഴ് സെല്‍വന്‍ എന്ന കഥാപാത്രമായി മണിരത്‌നം തീരുമാനിച്ചത് മമ്മൂട്ടിയെ ആയിരുന്നു. ഫോട്ടോഷൂട്ട് വരെ നടത്തി. പ്രകാശ് രാജ് ആ വേഷത്തിലൂടെ ദേശീയ പുരസ്‌കാരം നേടുകയും ചെയ്തു. ജോഷി സംവിധാനം ചെയ്ത 'റണ്‍ ബേബി റണ്‍' എന്ന ചിത്രത്തില്‍ നായകനാകേണ്ടിയിരുന്നത് മമ്മൂട്ടിയായിരുന്നു. ജീത്തു ജോസഫ് സംവിധാനം ചെയ്ത 'മെമ്മറീസ്' മമ്മൂട്ടിക്കായി എഴുതിയതായിരുന്നു. പൃഥ്വിരാജ് സാം അലക്‌സായി ചിത്രം മെഗാഹിറ്റായി. 2013-ല്‍ പുറത്തിറങ്ങിയ ബ്ലോക്ബസ്റ്റര്‍ ചിത്രമായ ദൃശ്യവും മമ്മൂട്ടി ഒഴിവാക്കിയതാണ്