വിവാഹപൂര്‍വ ബന്ധം ഉപയോഗിച്ച് യുവതിയില്‍ നിന്ന് 1.25 കോടി രൂപ തട്ടിയെടുത്ത മുന്‍ കാമുകനും പെണ്‍സുഹൃത്തും അറസ്റ്റില്‍

വിവാഹപൂര്‍വ ബന്ധം ഉപയോഗിച്ച് യുവതിയില്‍ നിന്ന് 1.25 കോടി രൂപ തട്ടിയെടുത്ത മുന്‍ കാമുകനും പെണ്‍സുഹൃത്തും അറസ്റ്റില്‍. ബെംഗളൂരുവിലാണ് സംഭവം. അപര്‍ണ, മഹേഷ് എന്നിവരെയാണ് പൊലീസ് അറസ്റ്റ് ചെയ്തത്. 1.25 കോടി രൂപ തട്ടിയെടുത്തിട്ടും വീണ്ടും പണം ആവശ്യപ്പെട്ടതോടെ യുവതി പൊലീസില്‍ പരാതിപ്പെടുകയായിരുന്നു. ഈ പരാതിയുടെ അടിസ്ഥാനത്തിലാണ് പൊലീസ് തട്ടിപ്പുകാരെ അറസ്റ്റ് ചെയ്തത്.
മഹേഷും അപര്‍ണയും സുഹൃത്തുക്കളാണ്. ഇരുവരും തമ്മില്‍ സംസാരിക്കുന്നതിനിടെ മഹേഷ് ആണ് യുവതിയുമായുള്ള പൂര്‍വകാല ബന്ധത്തെപ്പറ്റി അപര്‍ണയെ അറിയിക്കുന്നത്. യുവതി പിന്നീട് ഒരു വ്യവസായിയെ കല്യാണം കഴിച്ചു അതില്‍ ഒരു കുട്ടിയും ഉണ്ട്. കഥ കേട്ട അപര്‍ണ തട്ടിപ്പിനുള്ള വഴിയെപ്പറ്റി മഹേഷിനോട് വിശദീകരിച്ചു. തുടര്‍ന്ന് ഇരുവരും ചേര്‍ന്ന് പദ്ധതി തയ്യാറാക്കി. യുവതിയെ ഫോണില്‍ ബന്ധപ്പെട്ട മഹേഷ് പഴയ ബന്ധം പറയുകയും ഭീഷണിപ്പെടുത്തുകയുമായിരുന്നു. 1.25 കോടി രൂപ തന്നില്ലെങ്കില്‍ തങ്ങള്‍ ഒരുമിച്ചുള്ള ദൃശ്യങ്ങള്‍ പരസ്യപ്പെടുത്തുമെന്ന ഭീഷണിയെ തുടര്‍ന്ന് യുവതി ഈ തുക കൈമാറി. എന്നാല്‍ വീണ്ടും പണം ആവശ്യപ്പെട്ടതോടെ യുവതി ഭര്‍ത്താവിനോട് കാര്യങ്ങള്‍ പറഞ്ഞു. പിന്നീട് ഇവര്‍ പൊലീസില്‍ പരാതിപ്പെടുകയായിരുന്നു.