നടി കാവേരി സംവിധാന രംഗത്തേയ്ക്ക്

കാക്കോത്തിക്കാവിലെ അപ്പൂപ്പന്‍ താടികള്‍ എന്ന ചിത്രത്തിലൂടെ ബാലതാരമായി വെള്ളിത്തിരയിലെത്തിയ കാവേരി നിരവധി ചിത്രങ്ങളിലൂടെ മലയാളികളുടെ മനംകവര്‍ന്ന നായികയാണ്. ഉദ്യാന പാലകന്‍, ഗുരു, കിലുകില്‍ പമ്പരം, വാസന്തിയും ലക്ഷ്മിയും പിന്നെ ഞാനും, മിഥുനം തുടങ്ങി നിരവധി ചിത്രങ്ങളില്‍ കാവേരി വ്യത്യസ്തമായ കഥാപാത്രങ്ങളെ അവതരിപ്പിച്ചു. തിരുവല്ല സ്വദേശിയായ കാവേരിയുടെ യഥാര്‍ത്ഥ പേര് കല്യാണി എന്നാണ്. മലയാളത്തെ കൂടാതെ തമിഴിലും തെലുങ്കിലും കന്നടയിലും കാവേരി നായികയായി തിളങ്ങി.
ഇപ്പോള്‍ അഭിനയ മേഖല കൂടാതെ സംവിധാന രംഗത്തേക്കും കടന്നു വരികയാണ് കാവേരി. പുന്നകൈ പൂവേ എന്ന തമിഴ് ചിത്രമാണ് കാവേരി സംവിധാനം ചെയ്യുന്നത്. തെലുങ്ക് നടന്‍ ചേതന്‍ ചീനു നായക കഥാപാത്രത്തെ അവതരിപ്പിക്കുന്‌പോള്‍ ചിത്രത്തിലെ പ്രധാന കഥാപാത്രത്തെ അവതരിപ്പിക്കുന്നത് കാവേരി തന്നെയാണ്. യഥാര്‍ഥ സംഭവങ്ങളെ ആധാരമാക്കിയുള്ള ഈ സൈക്കോളജിക്കല്‍ ത്രില്ലര്‍ നിര്‍മിക്കുന്നതും കാവേരി തന്നെയാണ്.