1000 കോടി ബജറ്റില്‍ അടുപ്പിച്ച് മൂന്ന് സിനിമകള്‍…പ്രഭാസിന്റെ പ്രതിഫലം..!!!

ബ്രഹ്‌മാണ്ഡ ചലചിത്രം ബാഹുബലി പ്രഭാസിന്റെ കരിയര്‍ ബ്രേക്ക് തന്നെയാണ്.തുടരെ പ്രഭാസിനെ തേടി വന്‍ പ്രോജക്ടുകള്‍ നിരനിരയായി എത്തി. സ്വാഭാവികമായും അദ്ദേഹത്തിന്‍റെ പ്രതിഫലവും വര്‍ധിച്ചു.

രാധാകൃഷ്‍ണ കുമാര്‍ സംവിധാനം ചെയ്യുന്ന പിരീഡ് റൊമാന്‍റിക് ഡ്രാമ ചിത്രം 'രാധേ ശ്യാം', നാഗ് അശ്വിന്‍റെ സംവിധാനത്തില്‍ ഒരുങ്ങുന്ന, ഇനിയും പേരിട്ടിട്ടില്ലാത്ത സയന്‍സ് ഫിക്ഷന്‍ ചിത്രം, ഓം റാവത്ത് സംവിധാനം ചെയ്യുന്ന ബഹുഭാഷാ മിത്തോളജിക്കല്‍ 3ഡി ചിത്രം ആദിപുരുഷ്, ഇന്ന് പ്രഖ്യാപിക്കപ്പെട്ട, 'കെജിഎഫ്' സംവിധായകന്‍ പ്രശാന്ത് നീല്‍ സംവിധാനം ചെയ്യുന്ന പാന്‍-ഇന്ത്യന്‍ ചിത്രം 'സലാര്‍' എന്നിവയാണ് പ്രഭാസിന്‍റേതായി വരാനിരിക്കുന്ന പ്രോജക്ടുകള്‍. ഇവയെല്ലാം ബിഗ് ബജറ്റ് ചിത്രങ്ങളാണ് താനും.

പ്രഭാസിന്‍റെ നായികയായി പൂജ ഹെഗ്‍ഡെ എത്തുന്ന രാധെ ശ്യാമിന്‍റെ ബജറ്റ് 250 കോടിയാണെന്നാണ് റിപ്പോര്‍ട്ടുകള്‍. നിലവില്‍ 2022 ഓഗസ്റ്റ് 11ന് റിലീസ് പ്രഖ്യാപിച്ചിരിക്കുന്ന ആദിപുരുഷിന്‍റെ ബജറ്റ് ഇതിലും ഉയര്‍ന്നതാണ്. 450 കോടിയെന്നാണ് റിപ്പോര്‍ട്ടുകള്‍.

ബോളിവുഡ് താരം ദീപിക പദുകോണിന്‍റെ തെലുങ്ക് അരങ്ങേറ്റം കൂടിയായ നാഗ് അശ്വിന്‍ ചിത്രത്തിന്‍റെ ബജറ്റ് 300 കോടി ആണെന്നുമാണ് ട്രേഡ് അനലിസ്റ്റുകള്‍ പറയുന്നത്. അതായത് പ്രഭാസിന്‍റേതായി വരാനിരിക്കുന്ന നാല് സിനിമകളില്‍ മൂന്നെണ്ണത്തിന്‍റെ മുതല്‍മുടക്ക് ചേര്‍ത്തുവച്ചാല്‍ 1000 കോടി വരും!

75-80 കോടിയാണ് പ്രഭാസ് നിലവില്‍ ഒരു ചിത്രത്തിന് വാങ്ങിക്കൊണ്ടിരിക്കുന്നത്. ചില പ്രോജക്ടുകള്‍ക്ക് 10 ശതമാനം ലാഭവിഹിതം എന്നതും അദ്ദേഹം കരാറില്‍ ഉള്‍പ്പെടുത്താറുണ്ട്.
വരാനിരിക്കുന്ന നാല് സിനിമകള്‍ക്കുകൂടി പ്രഭാസ് വാങ്ങുന്ന പ്രതിഫലം ഉദ്ദേശം 400 കോടി വരുമെന്നാണ് ട്രേഡ് അനലിസ്റ്റുകള്‍ കണക്കുകൂട്ടുന്നത്.