കൊറിയൻ സംവിധായകൻ കിം കി–ഡുക് അന്തരിച്ചു ; ഇനി അദ്ദേഹത്തിന്റെ സിനിമകൾ ഈ ലോകത്തോട് സംസാരിക്കും..!!

റിഗ ∙ പ്രമുഖ കൊറിയൻ ചലച്ചിത്ര സംവിധായകൻ കിം കി-ഡുക് (60) അന്തരിച്ചു. ബാൾട്ടിക് രാജ്യമായ ലാത്വിയയിൽ ആയിരുന്ന കിം കി–ഡുക് ഇവി‌ടെ കോവിഡാനന്തരമുള്ള അസ്വസ്ഥതകളിലായിരുന്നു.
അറുപതാം പിറന്നാളിന് 9 ദിവസം ബാക്കി നിൽക്കെയായിരുന്നു മരണം.

വെനിസ് ചലച്ചിത്ര മേളയിൽ ഗോൾഡൻ ലയൺ (പിയാത്ത), സിൽവർ ലയൺ (3–അയൺ), ബെർലിൻ ചലച്ചിത്ര മേളയിൽ സിൽവർ ബെയർ (സമരിയ), കാൻ ചലച്ചിത്ര മേളയിൽ പുരസ്കാരം (അറിറാങ്) എന്നീ അംഗീകാരങ്ങൾ നേടിയിട്ടുണ്ട്. 1960 ഡിസംബർ 20ന് ദക്ഷിണ കൊറിയയിലെ ക്യോങ്സങ് പ്രവിശ്യയിലെ ബോങ്‍വയിലാണു ജനിച്ചത്.

ആദ്യകാലത്തെ ശാന്തമായ സിനിമകൾക്കു ശേഷം വയലൻസും ലൈംഗികതയും കിമ്മിന്റെ സിനിമകളെ ആരാധകരിൽ വേരുറപ്പിച്ചു. ഇതേപ്പറ്റി ചോദിപ്പോൾ, എല്ലാവരും ജീവിതത്തിന്റെ വെളിച്ചത്തെക്കുറിച്ച് സിനിമകളെടുക്കുന്നു, ഞാൻ ഇരുളിനെക്കുറിച്ചും എന്നായിരുന്നു അദ്ദേഹത്തിന്റെ മറുപടി.

സ്പ്രിങ്, സമ്മർ, ഫാൾ, വിന്റർ ആൻഡ് സ്പ്രിങ്, ദ് ബോ, ഡ്രീം, ബ്യൂട്ടിഫുൾ, ദ് നെറ്റ്, മോബിയസ്, പിയത്ത തു‌ടങ്ങിയവ പ്രധാനപ്പെട്ട സിനിമകളാണ്.