പൂജാരിമാരെ വിവാഹം ചെയ്താല്‍ മൂന്ന് ലക്ഷം

ബ്രാഹ്മണ യുവതികള്‍ക്ക് ഓഫറുമായി യദ്യൂരപ്പ സര്‍ക്കാര്‍

നിര്‍ദ്ധനരായ ബ്രാഹ്മണ യുവതികളുടെ വിവാഹത്തിന് പുതിയ പദ്ധതികളുമായി കര്‍ണ്ണാടക. കഴിഞ്ഞ വര്‍ഷം യദ്യൂരപ്പ സര്‍ക്കാര്‍ രൂപംകൊടുത്ത ബ്രഹ്മണ വികസന ബോര്‍ഡിന്റെ പരിധിയില്‍ ഉള്‍പ്പെടുത്തിക്കൊണ്ടാണ് സര്‍ക്കാര്‍ പുതിയതായി അരുന്ധതി, മൈത്രേയി എന്നീ പദ്ധതികള്‍ അവതരിപ്പിച്ചിരിക്കുന്നത്.
'അരുന്ധതി' എന്ന പദ്ധതി പ്രകാരം സാമ്പത്തികമായി പിന്നോക്കം നില്‍ക്കുന്ന ബ്രാഹ്മണ യുവതിയുടെ വിവാഹത്തിനായി 25,000 രൂപയാണ് സര്‍ക്കാര്‍ അനുവദിച്ചിരിക്കുന്നത്. രണ്ടാമത്തെ പദ്ധതിയായ 'മൈത്രേയി' പ്രകാരം പുരോഹിതന്മാരെ വിവാഹം ചെയ്യുന്ന ബ്രാഹ്മണ യുവതികള്‍ക്ക് മൂന്ന് ലക്ഷം രൂപയാണ് സര്‍ക്കാര്‍ അനുവദിച്ചിരിക്കുന്നത്. ചില നിബന്ധനകളും ബോര്‍ഡ് അധ്യക്ഷന്‍ എച്ച് എസ് സച്ചിതാനന്ദമൂര്‍ത്തി മുന്നോട്ടുവെയ്ക്കുന്നുണ്ട്.സാമ്പത്തികമായി പിന്നോക്കം നില്‍ക്കുന്ന ബ്രാഹ്മണ യുവതികള്‍ക്ക് മാത്രമായിരിക്കും പദ്ധതിയില്‍ ഭഗവാക്കുകളാവാന്‍ സാധിക്കുകയുള്ളു. ഇത് ആദ്യ വിവാഹം ആയിരിക്കുകയും വേണം. ഇവര്‍ ഒരു നിശ്ചിത കാലയളവില്‍ വിവാഹമോചിതരാവാന്‍ പാടുള്ളതുമല്ലെന്നും എച്ച് എസ് സച്ചിതാനന്ദ മൂര്‍ത്തി വ്യക്തമാക്കി.
ബോര്‍ഡിന്റെ റിപ്പോര്‍ട്ട് പ്രകാരം 500 ഓളം ബ്രാഹ്മണ യുവതികളാണ് 'അരുന്ധതി' പദ്ധതിക്ക് അര്‍ഹരായിരിക്കുന്നത്. അതേസമയം 25 പേരാണ് മൈത്രേയി പദ്ധതിയില്‍ ഉള്‍പ്പെട്ടിരിക്കുന്നത്. ബ്രാഹ്മണ വിഭാഗത്തെ ഒപ്പം നിര്‍ത്തുന്നതിന്റെ ഭാഗമായി യെദ്യൂരപ്പ സര്‍ക്കാര്‍ രൂപ കൊടുത്തിരക്കുന്ന പദ്ധതികളാണ് അരുന്ധതിയും മൈത്രേയിയും.