‘വര്‍ത്തമാനം’; പാര്‍വ്വതി ചിത്രം റിലീസ് നീട്ടി

പാര്‍വ്വതി തിരുവോത്ത് കേന്ദ്ര കഥാപാത്രത്തെ അവതരിപ്പിക്കുന്ന സിദ്ധാര്‍ഥ് ശിവ ചിത്രം വര്‍ത്തമാനത്തിന്റെ റിലീസ് തീയതി നീട്ടി. ഈ മാസം 19ന് തിയറ്ററില്‍ എത്താനിരുന്ന ചിത്രത്തിന്റെ പുതിയ റിലീസ് തീയതി മാര്‍ച്ച് 12 ആണ്.
ഡല്‍ഹിയിലെ ഒരു സര്‍വ്വകലാശാലയില്‍ ഗവേഷണത്തിനായി മലബാറില്‍ നിന്ന് എത്തുന്ന വിദ്യാര്‍ഥിയാണ് ചിത്രത്തില്‍ പാര്‍വ്വതി. സ്വാതന്ത്ര്യ സമര സേനാനി മുഹമ്മദ് അബ്ദുള്‍ റഹ്മാന്റെ ജീവിതമാണ് അവരുടെ ഗവേഷണ വിഷയം. സമകാലിക ഇന്ത്യന്‍ സമൂഹത്തിലെ രാഷ്ട്രീയ സാമൂഹ്യ പ്രശ്നങ്ങളെ ഫൈസാ സൂഫിയ എന്ന കഥാപാത്രത്തിന്റെ ജീവിതത്തിലൂടെ കാണിക്കുകയാണ് ചിത്രത്തില്‍.
സിദ്ധാര്‍ഥ് ശിവ സംവിധാനം ചെയ്യുന്ന ഏഴാമത്തെ ചിത്രമാണിത്. ആര്യാടന്‍ ഷൗക്കത്ത് തിരക്കഥ നിര്‍വ്വഹിച്ച ചിത്രത്തില്‍ റോഷന്‍ മാത്യു, സിദ്ദിഖ് എന്നിവരും പ്രധാന വേഷം ചെയ്യുന്നു. ബെന്‍സി പ്രൊഡക്ഷന്‍സിന്റെ ബാനറില്‍ ബെന്‍സി നാസറാണ് ചിത്രം നിര്‍മ്മിച്ചിരിക്കുന്നത്. ആര്യാടന്‍ ഷൗക്കത്തിനും നിര്‍മ്മാണ പങ്കാളിത്തമുണ്ട്.
വര്‍ത്തമാനത്തിന്റെ പ്രമേയം ദേശവിരുദ്ധവും മതസൗഹാര്‍ദ്ദം തകര്‍ക്കുന്നതാണെന്ന് ചൂണ്ടിക്കാട്ടി നേരത്തെ പ്രദര്‍ശനത്തിന് അനുമതി നിഷേധിച്ചിരുന്നു. സിനിമയുടെ പ്രമേയം രാജ്യവിരുദ്ധമാണെന്ന് സെന്‍സര്‍ ബോര്‍ജ് അംഗമായ ബിജെപി നേതാവ് വി സന്ദീപ് കുമാര്‍ ട്വിറ്ററിലൂടെ അഭിപ്രായപ്പെട്ടിരുന്നു. പിന്നീട് മുംബൈ സെന്‍സര്‍ റിവിഷന്‍ കമ്മിറ്റി ചിത്രത്തില്‍ വരുത്തിയ ചെറിയ മാറ്റങ്ങളോടെ പ്രദര്‍ശനത്തിന് അനുമതി നല്‍കുകയാണ് ഉണ്ടായത്.
ഡല്‍ഹി, ഉത്തരാഖണ്ഡ്, കേരളം എന്നിവടങ്ങളായിരുന്നു ചിത്രത്തിന്റെ പ്രധാന ലൊക്കേഷനുകള്‍. അഴകപ്പനാണ് ചിത്രത്തിന്റെ ഛായാഗ്രഹണം നിര്‍വ്വഹിച്ചത്. പശ്ചാത്തല സംഗീതം ബിജിപാല്‍, ഗാനരചന റഫീഖ് അഹമ്മദ്, വിശാല്‍ ജോണ്‍സണ്‍.