‘ഇന്‍ശാ അല്ലാഹ്’; മരക്കാര്‍ എന്ന് റിലീസ് എന്ന ചോദ്യം ദൈവത്തിന് വിട്ട് മോഹന്‍ലാല്‍

മരക്കാര്‍ അറബിക്കടലിന്റെ സിംഹം എന്ന സിനിമയുടെ റിലീസ് എന്ന ചോദ്യത്തിന് രസകരമായ ഉത്തരവുമായി മോഹന്‍ലാല്‍. ഇന്‍ശാ അല്ലാഹ് എന്നാണ് മോഹന്‍ലാല്‍ ഉത്തരം നല്‍കിയത്. ചിത്രത്തിന്റെ റിലീസിനായി കാത്തിരിക്കുകയാണെന്നും താരം പറഞ്ഞു. ദൃശ്യം 2 റിലീസിനോട് അനുബന്ധിച്ച് റിപ്പോര്‍ട്ടര്‍ ടിവിക്ക് നല്‍കിയ അഭിമുഖത്തിലാണ് മോഹന്‍ലാല്‍ ഇക്കാര്യം സംസാരിച്ചത്.
'മരക്കാര്‍ എന്ന സിനിമ മലയാളത്തില്‍ മാത്രം റിലീസ് ചെയ്യ്ത പോരല്ലോ. അമേരിക്കയില്‍, മിഡില്‍ ഈസ്റ്റില്‍, അങ്ങനെ ലോകം എമ്പാടും റിലീസ് ചെയ്യണം. അതും മലയാളം തമിഴ് തെലുങ്ക് ഹിന്ദി കന്നട ഭാഷകളില്‍. ഞങ്ങള്‍ വളരെ ആകാംഷയോടെ കാത്തിരിക്കുകയാണ്. ഒരു വര്‍ഷത്തോളമായുള്ള കാത്തിരിപ്പ്', മോഹന്‍ലാല്‍ പറയുന്നു.
മാര്‍ച്ച് 26ന് മരക്കാര്‍ റിലീസ് ചെയ്യാനായിരുന്നു തീരുമാനം. എന്നാല്‍ അന്യസംസ്ഥാന തീയറ്ററുകളില്‍ ആളുകള്‍ വരുന്നത് കുറയുന്നതിനാല്‍ വരുമാന നഷ്ട്ടമുണ്ടാകുന്നുണ്ട്. അത് പരിഹരിച്ചതിനു ശേഷം മാത്രമേ സിനിമയുടെ റിലീസ് തീയതി പ്രഖ്യാപിക്കുകയുള്ളുവെന്ന് അണിയറപ്രവര്‍ത്തകര്‍ അറിയിക്കുകയുണ്ടായി.
മോഹന്‍ലാല്‍ കേന്ദ്ര കഥാപാത്രമാവുന്ന ചിത്രം മലയാളത്തിന് പുറമെ ഹിന്ദി, തമിഴ്, തെലുങ്കു, കന്നട എന്നീ ഭാഷകളിലും പുറത്തിറങ്ങും. 100 കോടിയാണ് മരക്കാറിന്റെ ബജറ്റ്. തന്റെ സിനിമ ജീവിതത്തിലെ ഏറ്റവും ചിലവേറിയ സിനിമയാണിതെന്നും ചിത്രത്തിന്റെ സംവിധായകന്‍ പ്രിയദര്‍ശന്‍ പറഞ്ഞിരുന്നു.
മഞ്ജു വാര്യര്‍, സുനില്‍ ഷെട്ടി, പ്രഭു, കീര്‍ത്തി സുരേഷ് എന്നിവരാണ് ചിത്രത്തിലെ മറ്റ പ്രധാന കഥാപാത്രങ്ങള്‍. അനില്‍ ശശിയും പ്രിയദര്‍ശനും ചേര്‍ന്നാണ് ചിത്രത്തിന്റെ തിരക്കഥ നിര്‍വ്വഹിച്ചിരിക്കുന്നത്. തമിഴ് സിനിമ ഛായാഗ്രാഹകനായ തിരുനാവകാരസുവാണ് ചിത്രത്തിന്റെ ക്യാമറ ചെയ്തിരിക്കുന്നത്. ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂര്‍, സന്തോഷ് ടി കുരുവിള, റോയ് സി ജെ എന്നിവരാണ് ചിത്രം നിര്‍മ്മിക്കുന്നത്.