‘ഒരച്ഛനെന്ന നിലയില്‍ അഭിമാനം നിമിഷം’; മകളുടെ പുസ്തകം വാലെന്റൈന്‍സ് ദിനത്തിലെത്തുമെന്ന് മോഹന്‍ലാല്‍

മകള്‍ വിസ്മയ എഴുതിയ പുസ്തകം വാലെന്റൈന്‍സ് ദിനത്തില്‍ പുറത്തിറങ്ങുമെന്ന് മോഹന്‍ലാല്‍. ഒരച്ഛനെന്ന നിലയില്‍ അഭിമാന നിമിഷമാണെന്നും മോഹന്‍ലാല്‍ ഫേസ്ബുക്കില്‍ കുറിച്ചു. മകള്‍ക്ക് ആശംസകളും മോഹന്‍ലാല്‍ നേര്‍ന്നിട്ടുണ്ട്.
വിസ്മയ പലപ്പോളായി എഴുതിയ കവിതകളാണ് ഗ്രെയ്ന്‍സ് ഓഫ് സ്റ്റാര്‍ഡസ്റ്റ് എന്ന പുസ്തകം. പെന്‍ഗ്വിന്‍ ഇന്ത്യയാണ് പുസ്തകം പ്രസിദ്ധീകരിച്ചിരിക്കുന്നത്. ഫെബ്രുവരി 14ന് പുസ്തകം പുറത്തിറങ്ങും. പ്രണവ് മോഹന്‍ലാലും അടുത്തിടെ വിസ്മയയുടെ പുസ്തകത്തിന്റെ വിവരങ്ങള്‍ പങ്കുവെച്ചിരുന്നു.
സിനിമയില്‍ സജീവമല്ലെങ്കിലും വിസ്മയ ആരാധകര്‍ക്ക് പ്രിയപ്പെട്ട താരപുത്രിയാണ്. തന്റെ ഇന്‍സ്റ്റഗ്രാമില്‍ കവിതകളും, ചിത്രങ്ങളും, ഫിറ്റ്നസുമായി ബന്ധപ്പെട്ട വീഡിയോസ് എന്നിവയാണ് വിസ്മയ ഇന്‍സ്റ്റഗ്രാമില്‍ കൂടുതലും പോസ്റ്റ് ചെയ്യുന്നത്.
തന്റെ വെയ്റ്റ് ലോസ് ജേണിയെ കുറിച്ച് വിസ്മയ അടുത്തിടെ ഇന്‍സ്റ്റയില്‍ കുറിച്ചിരുന്നു. തായ്ലന്‍ഡിലെ ഹിറ്റ്ഹോക് എന്ന ഫിറ്റ്നസ് പരിശീലകന്റെ സഹായത്തോടെയാണ് വിസ്മയ 22 കിലോ ഭാരത്തോളം കുറച്ചത്.
അതേസമയം മോഹന്‍ലാല്‍ ദൃശ്യം 2 റിലീസിനായി കാത്തിരിക്കുകയാണ്. ഫെബ്രുവരി 19നാണ് ചിത്രം ആമസോണ്‍ പ്രൈമില്‍ റിലീസ് ചെയ്യുന്നത്. കുറച്ചു ദിവസം മുമ്പാണ് ചിത്രത്തിന്റെ ട്രെയ്‌ലര്‍ റിലീസ് ചെയ്തത്. ഫെബ്രുവരി എട്ടിന് പുറത്തിറക്കാനിരുന്ന ട്രെയ്ലര്‍ ചോര്‍ന്നതിനെ തുടര്‍ന്നാണ് നേരത്തെ റിലീസ് ചെയ്തത്. അമസോണ്‍ പ്രൈമിന് അബന്ധം പിണഞ്ഞ് ട്രെയ്ലര്‍ പുറത്തുവിടുകയായിരുന്നു. ട്രെയ്ലര്‍ പിന്‍വലിച്ചെങ്കിലും നിമിഷങ്ങള്‍ക്കുള്ളില്‍ തന്നെ വിവിധ യുട്യൂബ് ചാനലുകളില്‍ ട്രെയ്ലര്‍ എത്തുകായണ് ഉണ്ടായത്.
ന്യൂഇയര്‍ ദിനത്തിലായിരുന്നു ദൃശ്യം 2ന്റെ ഒടിടി റിലീസ് പ്രഖ്യാപിച്ചത്. മോഹന്‍ലാലിന്റെ ഫേസ്ബുക്ക് പേജിലൂടെയായിരുന്നു പ്രഖ്യാപനം. ഏഴ് വര്‍ഷം മുന്‍പ് സിനിമയുടെ ആദ്യഭാഗം പ്രേക്ഷകര്‍ക്കിടയില്‍ ഉണ്ടാക്കിയ സ്വാധീനമാണ് ഈ സിനിമയ്ക്ക് വേണ്ടിയുള്ള പ്രേക്ഷകരുടെ കാത്തിരിപ്പിന് പിന്നിലെ കാരണം. ആദ്യ ഭാഗത്തിലെ അഭിനേതാക്കളെ കൂടാതെ മുരളി ഗോപി , സായികുമാര്‍, ഗണേഷ് കുമാര്‍ തുടങ്ങിയവരും പ്രധാന വേഷം ചെയ്യുന്നുണ്ട്.