തണ്ണീര്‍മത്തന്‍ ദിനങ്ങള്‍ക്ക് പിന്നാലെ ‘പത്രോസിന്റെ പടപ്പുകളു’മായി ഡിനോയ്; പോസ്റ്റര്‍ പങ്കുവെച്ച് മമ്മൂട്ടിയും പൃഥ്വിരാജും

തണ്ണീര്‍മത്തന്‍ ദിനങ്ങള്‍ക്ക് ശേഷം ഡിനോയ് പൗലോസ് തിരക്കഥ ഒരുക്കുന്ന 'പത്രോസിന്റെ പടപ്പുകള്‍' എന്ന പുതിയ ചിത്രത്തിന്റെ ടൈറ്റില്‍ പോസ്റ്റര്‍ പുറത്തിറങ്ങി. മമ്മൂട്ടിയും പൃഥ്വിരാജും ചേര്‍ന്നാണ് പോസ്റ്റര്‍ റിലീസ് ചെയ്തത്. മരിക്കാര്‍ എന്റര്‍ടൈന്‍മെന്‍സിന്റെ ബാനറില്‍ ഒരുങ്ങുന്ന ചിത്രം അഫ്‌സല്‍ അബ്ദുല്‍ ലത്തീഫാണ് സംവിധാനം ചെയ്യുന്നത്.
അഫ്‌സല്‍ അബ്ദുല്‍ ലത്തീഫിന്റെ ആദ്യ സംവിധാന സംരംഭമാണ്. തിരക്കഥയ്ക്ക് പുറമെ ഡിനോയ് ചിത്രത്തില്‍ പ്രധാന വേഷത്തില്‍ എത്തുന്നുമുണ്ട്. ഷറഫുദീന്‍ , ഗ്രേസ് ആന്റണി , നസ്ലിന്‍, രഞ്ജിത മേനോന്‍ തുടങ്ങിയവര്‍ മറ്റു കേന്ദ്ര കഥാപാത്രങ്ങളെ അവതരിപ്പിക്കുന്നു. കുടുംബങ്ങളുടെ പേരുവിവരങ്ങള്‍ ഒരു റേഷന്‍ കാര്‍ഡില്‍ കൊടുത്തിരിക്കുന്നതുപോലെയാണ് പോസ്റ്റര്‍.
സുരേഷ് കൃഷ്ണ , ജോണി ആന്റണി, ജെയിംസ് ഏലിയാ, ഷമ്മി തിലകന്‍ തുടങ്ങിയവരോടൊപ്പം നിരവധി പുതുമുഖങ്ങളും അരങ്ങേറ്റം കുറിക്കുന്നു. വൈപ്പിന്‍, എറണാകുളം പശ്ചാത്തലത്തില്‍ കഥ പറയുന്ന ചിത്രത്തിന്റെ ഷൂട്ടിങ് ഉടന്‍ ആരംഭിക്കുന്നു .
ജയേഷ് മോഹന്‍ ക്യാമറയും ജേക്‌സ് ബിജോയ് സംഗീതവും നിര്‍വഹിക്കുന്ന ചിത്രത്തിന്റെ പ്രൊഡക്ഷന്‍ കണ്‍ട്രോളര്‍ ജാവേദ് ചെമ്പാണ്. കല ആഷിക്. എസ്, വസ്ത്രലങ്കാരം ശരണ്യ ജീബു, എഡിറ്റ് -സംഗീത് പ്രതാപ്, മേക്കപ്പ് സിനൂപ് രാജ്, മുഖ്യ സംവിധാന സഹായി കണ്ണന്‍ എസ് ഉള്ളൂര്‍, സ്റ്റില്‍ സിബി ചീരന്‍ , പി ആര്‍ ഒ എ സ് ദിനേശ് , ആതിര ദില്‍ജിത്ത്, സൗണ്ട് മിക്‌സ് വിഷ്ണു സുജാതന്‍, പരസ്യ കല യെല്ലോ ടൂത്ത്.