പ്രതീക്ഷയുടെ സംഗീതവുമായി ‘ഒരേ പകല്‍’; ദൃശ്യത്തിലെ ഗാനമെത്തി

ദൃശ്യം 2ലെ ആദ്യ ഗാനമെത്തി. മോഹന്‍ലാലിന്റെ ഫേസ്ബുക്ക് പേജിലൂടെയാണ് ഒരേ പകല്‍ എന്ന് തുടങ്ങുന്ന ഗാനം പുറത്തുവിട്ടത്.മോഹന്‍ലാല്‍ അവതരിപ്പിക്കുന്ന ജോര്‍ജുകുട്ടിയും കുടുംബവും അനുഭവിക്കുന്ന മനോവികാരങ്ങളാണ് നാല് മിനിറ്റ് 32 സെക്കന്റ് ദൈര്‍ഖ്യമുള്ള ഗാനത്തില്‍ കാണിക്കുന്നത്. സംഗീത ശ്രീകാന്താണ് ഒരേ പകല്‍ എന്ന ഗാനം പാടിയിരിക്കുന്നത്. അനില്‍ ജോണ്‍സന്‍ ചിത്രത്തിനായി സംഗീതം ഒരുക്കുന്നു.
നേരത്തെ ഗാനത്തിന്റെ ലിറിക്കല്‍ വീഡിയോ പുറത്തുവിട്ടിരുന്നു. മികച്ച പ്രതികരണമാണ് ലിറിക്കല്‍ വീഡിയോയ്ക്ക് ലഭിച്ചത്.ഫെബ്രുവരി 19ന് ആമസോണ്‍ പ്രൈമിലൂടെയാണ് ദൃശ്യം 2 റിലീസ് ചെയ്യുന്നത്. ചിത്രത്തിന്റെ പ്രൊമോഷനുമായി ബന്ധപ്പെട്ട് നിരവധി പരിപാടികളാണ് ആമസോണ്‍ തുടങ്ങിയിരിക്കുന്നത്. ദൃശ്യം 2ന്റെ ഒഫീഷ്യല്‍ വെബ്‌സൈറ്റും ഗെയിമുമെല്ലാം ആമസോണ്‍ ഒരുക്കിയിട്ടുണ്ട്.
ഏഴ് വര്‍ഷങ്ങള്‍ക്കിടയില്‍ ജോര്‍ജ്കുട്ടിയുടെ കുടുംബത്തിന് വന്ന മാറ്റങ്ങളിലൂടെയാണ് ദൃശ്യം 2ന്റെ ട്രെയ്‌ലര്‍ തുടങ്ങുന്നത്. തുടര്‍ന്ന് നാട്ടില്‍ ആളുകള്‍ മരിച്ച വരുണിനെയും ജോര്‍ജ്കുട്ടിയുടെ മകളെയും കുറിച്ച് കഥകള്‍ പറഞ്ഞുണ്ടാക്കുന്നുണ്ട്. ഏഴ് വര്‍ഷം മുമ്പ് ജോര്‍ജുകുട്ടിയുടെ കുടുംബത്തോട് ഉണ്ടായ നാട്ടുകാരുടെ വിശ്വാസത്തിന് ചെറിയ തോതില്‍ മാറ്റം വരുന്നത് ട്രെയ്ലറില്‍ കാണാം. ചിത്രത്തിലെ പുതിയ പൊലീസ് കഥാപാത്രങ്ങളും, ഗീതാ പ്രഭാകരും ട്രെയ്ലറിലുണ്ട്. ദുരൂഹതകള്‍ ബാക്കിവെച്ചുകൊണ്ടാണ് ദൃശ്യം 2 ട്രെയ്ലര്‍ അവസാനിപ്പിക്കുന്നത്.