‘ദ ഗ്രേറ്റ് എസ്‌കേപ്പ്’ ബാബു ആന്റണിക്കൊപ്പം മകനും

ബാബു ആന്റണി നായകനാകുന്ന ചിത്രത്തില്‍ അഭിനയിക്കാന്‍ മകന്‍ ആര്‍തര്‍ ബാബു ആന്റണിയും. 'ദ ഗ്രേറ്റ് എസ്‌കേപ്പ്' എന്ന സിനിമയിലാണ് അച്ഛനും മകനും ഒരുമിച്ചെത്തുന്നത്. ആര്‍തറിന്റെ അരങ്ങേറ്റ ചിത്രം കൂടെയാണിത്. ചിത്രത്തിന്റെ ലൊക്കേഷന്‍ ഫോട്ടോകളില്‍ ആര്‍തര്‍ ബാബു ആന്റണിയുടെ ഫോട്ടോ സാമൂഹിക മാധ്യമങ്ങളില്‍ ചര്‍ച്ചയാണിപ്പോള്‍. ബാബു ആന്റണി തന്നെയാണ് മകനൊപ്പമുള്ള ഫോട്ടോ സോഷ്യല്‍ മീഡിയയിലൂടെ പങ്കുവെച്ചത്. പൂര്‍ണമായും അമേരിക്കയിലാണ് ചിത്രം ഷൂട്ട് ചെയ്യുന്നത്. അമേരിക്കയിലെ മാഫിയ സംഘങ്ങള്‍ തമ്മിലുളള പോരാട്ടമാണ് ദ ഗ്രേറ്റ് എസ്‌കേപ്പിന്റെ ഇതിവൃത്തം. അധോലോക നായകനായ ബോബാ എന്ന കഥാപാത്രത്തെയാണ് താരം അവതരിപ്പിക്കുന്നത്. ഹോളിവുഡ് ശൈലിയിലുള്ള ആക്ഷന്‍ രംഗങ്ങളാണ് ചിത്രത്തിന്റെ പ്രത്യേകത. സൗത്ത് ഇന്ത്യന്‍ യുഎസ് ഫിലിംസിന്റെ ബാനറില്‍ നിര്‍മിക്കുന്ന ചിത്രത്തിന്റെ സംഗീത സംവിധായകന്‍ രഞ്ജിത് ഉണ്ണിയാണ്. പശ്ചാത്തല സംഗീതം കൈസാദ് പട്ടേല്‍, പ്രൊഡക്ഷന്‍ ഡിസൈനര്‍ ചാസ് ടെയ്ലറും ജോണി ഓവനുമാണ്. സണ്ണി കരികല്‍ ആണ് ചിത്രത്തിന്റെ പ്രൊഡക്ഷന്‍ കണ്‍ട്രോളര്‍.