ശാരി വീണ്ടും മലയാളത്തിലേക്ക്; ‘വിഡ്ഢികളുടെ മാഷ്’ സിനിമയുടെ ടൈറ്റില്‍ പോസ്റ്റര്‍ പുറത്ത്

നവാഗതനായ അനീഷ് വി എ സംവിധാനം ചെയ്യുന്ന ചിത്രം 'വിഡ്ഢികളുടെ മാഷ്' എന്ന സിനിമയുടെ ടൈറ്റില്‍ പോസ്റ്റര്‍ പുറത്തുവിട്ടു. നടി ശാരി, പ്രൊഡക്ഷന്‍ ഡിസൈനര്‍ എന്‍ എം ബാദുഷ, ദേവ് മോഹന്‍, വിഷ്ണു ഗോവിന്ദന്‍, ബിലഹരി, സുരഭി ലക്ഷ്മി, വികെ പ്രകാശ്, പ്രജേഷ് സെന്‍, അഞ്ജലി നായര്‍ എന്നിവര്‍ അവരുടെ സോഷ്യല്‍ മീഡിയ പേജുകളിലൂടെയാണ് പോസ്റ്റര്‍ പുറത്ത് വന്നിരിക്കുന്നത്. ദിലീപ് മോഹന്‍, അഞ്ചലി നായര്‍, ശാരി എന്നിവരാണ് ചിത്രത്തില്‍ പ്രധാന വേഷങ്ങളെ അവതരിപ്പിക്കുന്നത്. ദിലീപ് മോഹന്‍ തന്നെ കഥയും തിരക്കഥയും എഴുതിയ ചിത്രത്തില്‍ മണിയന്‍പിള്ള രാജു, അനീഷ് ഗോപാല്‍, തമിഴ് നടന്‍ മനോബാല, മണികണ്ഠന്‍ പട്ടാമ്പി (മറിമായം), സുനില്‍ സുഖദ, നിര്‍മ്മല്‍ പാലാഴി, രാജേഷ് പറവൂര്‍ എന്നീ താരങ്ങളും സോഷ്യല്‍ മീഡിയയിലൂടെ ശ്രദ്ധേയരായ അഖില്‍ സി ജെ , സ്റ്റീവ്, ദിവിന്‍ പ്രഭാകര്‍, ദിലീപ് പാലക്കാട്, അമേയ തുമ്പി എന്നിവരും അണിനിരക്കുന്നു. ബിജി ബാല്‍ സംഗീതം ഒരുക്കിയിരിക്കുന്ന സിനിമയില്‍ റഫീഖ് അഹമ്മദിന്റെ വരികള്‍ പാടിയിരിക്കുന്നത് കെഎസ് ചിത്രയും സൂരജ് സന്തോഷുമാണ്. മാഫിയ ശശി സംഘട്ടനം ഒരുക്കിയിരുന്നു. നര്‍മ്മവും ആക്ഷേപ ഹാസ്യവും ഒത്തിണങ്ങിയ ചിത്രം ബാംഗ്ലൂരിലെ പ്രൊഡക്ഷന്‍ കമ്പനിയായ ബ്ലാക്ക് ബെഞ്ചേഴ്സ് ഡ്രാമയാണ് പ്രേക്ഷകരിലേക്ക് എത്തിക്കുന്നത്. ശരിയായ അധ്യാപനം, ഒരു അധ്യാപകന്റെ ജീവിതത്തിലൂടെ വരച്ചു കാട്ടാന്‍ ചിത്രം ശ്രമിച്ചിട്ടുണ്ട്. പുതിയ തലമുറയും പഴയ തലമുറയും തമ്മിലുള്ള സൗഹൃദങ്ങളും ചിത്രത്തില്‍ കാണാന്‍ സാധിക്കുമെന്ന് ശാരി ആഭിപ്രായപ്പെട്ടു.