‘ആത്മാര്‍ത്ഥമായ ശ്രമങ്ങള്‍ കണ്ടില്ലെന്ന് നടിക്കാന്‍ പറ്റില്ല’; കനകം കാമിനി കലഹത്തെക്കുറിച്ച് സംവിധായകന്‍ രഞ്ജിത്ത്

നിവിന്‍ പോളി നായകനായെത്തിയ പുതിയ ചിത്രം കനകം കാമിനി കലഹത്തെ പ്രശംസിച്ച് സംവിധായകന്‍ രഞ്ജിത്ത്. ചിത്രത്തിലെ താരങ്ങള്‍ എല്ലാം ഏറ്റവും മികച്ച രീതിയിലാണ് അഭിയനയിച്ചിരിക്കുന്നത് എന്ന് അദ്ദേഹം പറഞ്ഞു. രതീഷ് ബാലകൃഷ്ണ പൊതുവാളിനെ പോലുള്ള ചെറുപ്പക്കാരുടെ ഈ ശ്രമങ്ങളെ അംഗീകരിച്ചേ മതിയാകൂ എന്നും അദ്ദേഹം പറഞ്ഞു. രഞ്ജിത്തിന്റെ വാക്കുകള്‍: ആദ്യ ചിത്രത്തിലൂടെ തന്നെ പ്രേക്ഷകരുടെ സ്വീകാര്യത ലഭിച്ച സംവിധായകനാണ് രതീഷ് ബാലകൃഷ്ണ പൊതുവാള്‍. അദ്ദേഹത്തിന്റെ പുതിയ സിനിമ റിലീസ് ചെയ്തു. സത്യത്തില്‍ ഞാന്‍ ഈ സിനിമ കാണുവാന്‍ വൈകുമായിരുന്നു. എന്റെ ഇളയ മകനാണ് അച്ഛന്‍ ഈ സിനിമ കാണണം എന്ന് ആവശ്യപ്പെട്ടത്. ചില സിനിമകള്‍ നമ്മോടൊപ്പം ദിവസങ്ങള്‍ സഞ്ചരിക്കുന്ന അവസ്ഥ ഉണ്ടാകും. ആ അവസ്ഥ കനകം കാമിനി കലഹത്തില്‍ ഉണ്ടായി എന്നുള്ളത് യാഥാര്‍ഥ്യം. ഇതിനകം പ്രേക്ഷകര്‍ സ്വീകരിച്ച ഒരു സിനിമയെക്കുറിച്ചാണ് ഞാന്‍ പറയുന്നത് എന്ന് അറിയാം. എങ്കിലും പറയാതെ വയ്യ. രതീഷിനെ പോലുളള ചെറുപ്പക്കാരുടെ ആത്മാര്‍ത്ഥമായ ശ്രമങ്ങള്‍ കണ്ടില്ലെന്ന് നടിക്കാന്‍ പറ്റില്ല. ആന്റണ്‍ ചെക്കോവിന്റെ നാടകങ്ങളെ അനുസ്മരിപ്പിക്കുന്ന വിധമായിരുന്നു ചിത്രത്തിന്റെ അവതരണ ശൈലി. അഭിനയിച്ച എല്ലാവരും മികച്ച പ്രകടനമാണ് നടത്തിയത്. നിവിന്‍ പോളിയ്ക്കും അഭിനന്ദനങ്ങള്‍. നിവിനും രതീഷിനും എല്ലാവര്‍ക്കും എന്റെ അനുമോദനങ്ങളും ആശംസകളും. കനകം കാമിനി കലഹം നവംബര്‍ 12ന് ഡിസ്‌നി പ്ലസ് ഹോട്ട്സ്റ്റാറിലൂടെയാണ് റിലീസ് ചെയ്തത്. രതീഷ് ബാലകൃഷ്ണ പൊതുവാള്‍ തിരക്കഥയെഴുതി സംവിധാനം ചെയ്യുന്ന ചിത്രത്തില്‍ നിവിന്‍ പോളി, ഗ്രേസ് ആന്റണി, വിനയ് ഫോര്‍ട്ട് എന്നിവര്‍ പ്രധാന കഥാപാത്രങ്ങളെ അവതരിപ്പിക്കുന്നു. സുധീഷ്, ജോയ് മാത്യു, ജാഫര്‍ ഇടുക്കി, ശിവദാസന്‍ കണ്ണൂര്‍, സുധീര്‍ പറവൂര്‍, രാജേഷ് മാധവന്‍,വിന്‍സി അലോഷ്യസ് തുടങ്ങിയവരാണ് മറ്റു പ്രമുഖ താരങ്ങള്‍. നിവിന്‍ പോളിയുടെ പോളി ജൂനിയര്‍ പിക്ചേഴ്സിന്റെ ബാനറാണ് ചിത്രം നിര്‍മ്മിക്കുന്നത്. ആന്‍ഡ്രോയ്ഡ് കുഞ്ഞപ്പനിലൂടെ മികച്ച നവാഗത സംവിധായകനുള്ള അവാര്‍ഡ് കരസ്ഥമാക്കിയ സംവിധായകന്‍ കൂടിയാണ് രതീഷ് ബാലകൃഷ്ണ പൊതുവാള്‍.