ഉണ്ണി മുകുന്ദന്‍ വീണ്ടും തെലുങ്കിലേക്ക്; ‘യശോദ’; ഒപ്പം സാമന്തയും

നടന്‍ ഉണ്ണി മുകുന്ദന്‍ വീണ്ടും തെലുങ്കിലേക്ക്. യശോദ എന്ന ചിത്രത്തിലാണ് അദ്ദേഹം നായകനായെത്തുന്നത്. സാമന്തയാണ് ചിത്രത്തിലെ നായിക. ഹരിയും ഹരീഷ് ശങ്കറും ചേര്‍ന്നാണ് ചിത്രം സംവിധാനം ചെയ്യുന്നത്. തമിഴിലും തെലുങ്കിലും ഒരേ സമയം ഒരുങ്ങുന്ന സിനിമ ഡിസംബര്‍ ആദ്യവാരം ഹൈദരാബാദില്‍ ആരംഭിക്കും. വരലക്ഷ്മി ശരത്കുമാറും സിനിമയില്‍ പ്രധാന കഥാപാത്രത്തെ അവതരിപ്പിക്കുന്നുണ്ട്. ശ്രീദേവി മൂവീസാണ് ചിത്രം നിര്‍മിക്കുന്നത്. 2016ല്‍ ജനത ഗാരേജ് എന്ന സിനിമയിലൂടെയാണ് ഉണ്ണി മുകുന്ദന്‍ തെലുങ്കില്‍ അരങ്ങേറ്റം കുറിക്കുന്നത്. ചിത്രത്തില്‍ മോഹന്‍ലാലിന്റെ മകനായാണ് നടന്‍ എത്തിയത്. പിന്നീട് അനുഷ്‌ക ഷെട്ടി കേന്ദ്ര കഥാപാത്രമായി എത്തിയ ബാഗമതിയിലും നടന്‍ ശ്രദ്ധേയമായ കഥാപാത്രത്തെ അവതരിപ്പിച്ചിരുന്നു. അതേസമയം നിരവധി സിനിമകളാണ് ഉണ്ണി മുകുന്ദന്റേതായി അണിയറയില്‍ ഒരുങ്ങുന്നത്. മോഹന്‍ലാല്‍ നായകനാകുന്ന 12ത് മാന്‍, ബ്രോ ഡാഡി എന്നീ സിനിമകളില്‍ നടന്‍ പ്രധാന കഥാപാത്രമായി എത്തുന്നുണ്ട്.