‘മരയ്ക്കാറിനെക്കുറിച്ച് എല്ലാമെല്ലാമായ വേണുച്ചേട്ടന്റെ വാക്കുകള്‍’; പങ്കുവച്ച് മോഹന്‍ലാല്‍

മരക്കാര്‍ അറബിക്കടലിന്റെ സിംഹം ഇനി റിലീസിനൊരുങ്ങാന്‍ 9 ദിവസം ബാക്കി നില്‍ക്കെ ചിത്രത്തിലെ നിറസാന്നിധ്യമായ നെടുമുടിവേണുവിന്റെ വാക്കുകകള്‍ ഓര്‍ത്തെടുത്ത് മോഹന്‍ലാല്‍. വാക്കിലും പ്രവര്‍ത്തിയിലും സ്നേഹം നിറച്ച വേണുച്ചേട്ടന്‍ എപ്പോഴും മരക്കാറിനെ കുറിച്ച് പറഞ്ഞതും അതുതന്നെയായിരുന്നുവെന്നാണ് മോഹന്‍ലാല്‍ കുറിച്ചത്. ആശിര്‍വാദ് സിനിമാസിന്റെ യൂട്യൂബ് വീഡിയോയില്‍ നെടുമുടി വേണുവിന്റെ വാക്കുകള്‍ പങ്കുവെച്ചുകൊണ്ടാണ് മോഹന്‍ലാല്‍ തന്റെ സോഷ്യല്‍ മീഡിയയില്‍ അദ്ദേഹത്തിന്റെ ഓര്‍മകള്‍ കുറിച്ചത് മോഹന്‍ലാലിന്റെ വാക്കുകള്‍; 'സ്നേഹം!. വാക്കുകളിലും പ്രവര്‍ത്തിയിലും സ്നേഹം എപ്പോഴും വാരിനിറച്ചിരുന്ന വേണുച്ചേട്ടന്‍, മരയ്ക്കാര്‍ എന്ന നമ്മുടെ സ്വപ്നസിനിമയെക്കുറിച്ച് പറഞ്ഞതുംഅതുതന്നെയാണ്. എല്ലാ സ്നേഹത്തേക്കാളും മുകളില്‍ നില്‍ക്കുന്നതും എല്ലാ സ്നേഹത്തേക്കാളും വാഴ്ത്തപ്പെടേണ്ടതും, ദേശസ്നേഹമാണെന്ന് സത്യം. ഒരു വലിയ കൂട്ടായ്മയുടെ കഠിനപ്രയത്നത്തിന്റെയും അര്‍പ്പണബോധത്തിന്റെയും ഫലമായി ഉടലെടുത്ത ഈ സിനിമയിലെ നിറസാന്നിധ്യം ആയിരുന്നു വേണുച്ചേട്ടന്‍ എന്ന ആ വലിയ കലാകാരന്‍. മരയ്ക്കാര്‍ സിനിമയെക്കുറിച്ച്, അന്നും ഇന്നും എന്നും ഞങ്ങളുടെ എല്ലാമെല്ലാമായ വേണുച്ചേട്ടന്റെ വാക്കുകള്‍' മോഹന്‍ലാലിനെ കേന്ദ്ര കഥാപാത്രമാക്കി പ്രിയദര്‍ശന്‍ സംവിധാനം ചെയ്യുന്ന ചിത്രമാണ് മരക്കാര്‍ അറബിക്കടലിന്റെ സിംഹം. ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂര്‍, സന്തോഷ് ടി കുരുവിള, റോയ് സി ജെ എന്നിവരാണ് ചിത്രം നിര്‍മ്മിക്കുന്നത്.മലയാളത്തിന് പുറമെ ഹിന്ദി, തമിഴ് തെലുങ്ക്, കന്നട എന്നീ ഭാഷകളിലും ചിത്രം റിലീസ് ചെയ്യും. മഞ്ജു വാര്യര്‍, സുനില്‍ ഷെട്ടി, പ്രഭു, കീര്‍ത്തി സുരേഷ് എന്നിവരാണ് ചിത്രത്തിലെ മറ്റ പ്രധാന കഥാപാത്രങ്ങള്‍. അനില്‍ ശശിയും പ്രിയദര്‍ശനും ചേര്‍ന്നാണ് ചിത്രത്തിന്റെ തിരക്കഥ നിര്‍വ്വഹിച്ചിരിക്കുന്നത്.