‘നിയമപ്രകാരം പണം നല്‍കിയാണ് സാര്‍, പ്രചാരണം’; ‘കുറുപ്പി’ന്റെ മറുപടി

ദുല്‍ഖര്‍ സല്‍മാന്‍ നായകനായ കുറുപ്പ് സിനിമയുടെ പ്രചാരണത്തിന്റെ ഭാഗമായി കാറില്‍ സ്റ്റിക്കര്‍ പതിപ്പിച്ച സംഭവത്തില്‍ മറുപടിയുമായി അണിയറപ്രവര്‍ത്തകര്‍. നിയമപ്രകാരം പണം നല്‍കിയാണ് ഇത്തരത്തില്‍ വാഹനത്തില്‍ സ്റ്റിക്കര്‍ ഒട്ടിച്ച് പ്രചാരണം നടത്തിയതെന്നും പാലക്കാട് ആര്‍ടിഒ ഓഫിസില്‍ ഇതുമായി ബന്ധപ്പെട്ട നിയമപ്രകാരമുള്ള എല്ലാ കാര്യങ്ങളും ചെയ്തിട്ടുണ്ടെന്നും അണിയറപ്രവര്‍ത്തകര്‍ വ്യക്തമാക്കി. തുടര്‍ന്നാണ് വാഹനം റോഡില്‍ ഇറക്കിയതെന്നും അണിയറക്കാര്‍ അറിയിച്ചു. ചില 'പ്രമുഖ' യുട്യൂബര്‍മാരാണ്, മോട്ടോര്‍ വാഹന വകുപ്പിനെ വിമര്‍ശിച്ച് കുറുപ്പ് കാറിനെതിരെ രംഗത്തെത്തിയത്. നിയമവിരുദ്ധമായ പ്രചാരണപ്രവര്‍ത്തനങ്ങളാണ് കുറുപ്പ് അണിയറപ്രവര്‍ത്തകര്‍ നടത്തുന്നതെന്നാണ് ഇവരുടെ വാദം. ഇതിനെതിരെയാണ് മോട്ടോര്‍ വാഹനവകുപ്പില്‍ പണം അടച്ചതിന്റെ രേഖപ്രകാരം കുറുപ്പ് അണിയറപ്രവര്‍ത്തകര്‍ രംഗത്തെത്തിയത്. കുപ്രസിദ്ധ പിടികിട്ടാപ്പുള്ളി സുകുമാര കുറുപ്പിന്റെ ജീവിതം ആസ്പദമാക്കിയൊരുക്കിയ ചിത്രമാണ് ദുല്‍ഖാര്‍ നായകനായ 'കുറുപ്പ്. ശ്രീനാഥ് രാജേന്ദ്രനാണ് സംവിധാനം നിര്‍വഹിച്ചത്.