വര്‍ഷങ്ങള്‍ ശേഷം സ്‌ക്രീന്‍ പങ്കിട്ട് മമ്മൂട്ടിയും അശോകനും; എല്‍ ജെ പി ചിത്രം ‘നന്‍പകല്‍ നേരത്ത് മയക്കം’

ലിജോ ജോസ് പെല്ലിശ്ശേരി-മമ്മൂട്ടി കൂട്ടുകെട്ടില്‍ ഒരുങ്ങുന്ന 'നന്‍പകല്‍ നേരത്ത് മയക്കം' എന്ന ചിത്രത്തില്‍ അശോകനും പ്രധാന കഥാപാത്രത്തെ അവതരിപ്പിക്കുന്നു. അമരത്തിന് ശേഷം മമ്മൂട്ടിയും അശോകനും ഒന്നിക്കുന്ന ചിത്രം കൂടിയാണിത്. മുപ്പത് വര്‍ഷങ്ങള്‍ക്ക് ശേഷം അഭിനയിക്കുന്ന സിനിമയാകുമ്പോള്‍ എന്നെ സംബന്ധിച്ച് അതിലൊരു പ്രത്യേകതയുണ്ടെന്ന് അശോകന്‍ പറഞ്ഞു. അശോകന്റെ വാക്കുകള്‍; മുപ്പത് വര്‍ഷങ്ങള്‍ക്ക് ശേഷം മമ്മൂക്കക്ക് ഒപ്പം അഭിനയിക്കുന്ന സിനിമയാകുമ്പോള്‍ എന്നെ സംബന്ധിച്ച് അതിലൊരു പ്രത്യേകതയുണ്ട്. ലിജോ ജോസ് പെല്ലിശ്ശേരി സംവിധാനം ചെയ്യുന്ന സിനിമയാണ്. സാധാരണ സിനിമ രീതികളില്‍ നിന്നും വ്യത്യസ്തമായ സിനിമയാണ്. എന്റെ അടക്കമുള്ള ചിത്രത്തിലെ എല്ലാ കഥാപാത്രങ്ങളും അങ്ങനെ തന്നെയാണ്. മമ്മൂട്ടിക്കൊപ്പം വീണ്ടും ഒന്നിക്കുന്ന സിനിമ അദ്ദേഹത്തിന്റെ സ്വന്തം പ്രൊഡഷന്‍ കൂടിയാണെന്നത് എന്നെ സംബന്ധിച്ച് സന്തോഷം നല്‍കുന്ന കാര്യമാണ്. ലിജോയുടെ കഥക്ക് എസ് ഹരീഷാണ് തിരക്കഥയും സംഭാഷണവും ഒരുക്കുന്നത്. 'മമ്മൂട്ടി കമ്പനി'യുടെ ബാനറില്‍ മമ്മൂട്ടി തന്നെയാണ് ചിത്രം നിര്‍മ്മിക്കുന്നത്. പുതിയ ബാനറിന്റെ ആദ്യ നിര്‍മ്മാണ സംരംഭം കൂടെയാണ് നന്‍പകല്‍ നേരത്ത് മയക്കം. സിനിമയുടെ ചിത്രീകരണം തമിഴ് നാട്ടില്‍ പുരോഗമിക്കുകയാണ്. പൂര്‍ണമായും തമിഴ് നാട്ടില്‍ ഷൂട്ട് നടക്കുന്ന ചിത്രം മലയാളത്തിലും തമിഴിലും ആയാണ് ഒരുങ്ങുന്നത്.