ലിജോ- മമ്മൂട്ടി ചിത്രം ‘നന്‍പകല്‍ നേരത്ത് മയക്കം’ ചിത്രീകരണം പൂര്‍ത്തിയായി; ആകാംഷയോടെ പ്രേക്ഷകര്‍

'ചുരുളി' ഉയര്‍ത്തിയ വിവാദങ്ങള്‍ക്കും ചര്‍ച്ചകള്‍ക്കും ഒക്കെ ഒരു ശമനമുണ്ടാകുമ്പോള്‍, ലിജോ തന്റെ പുതിയ ചിത്രത്തിന്റെ തിരക്കിലാണ്. മമ്മൂട്ടി പ്രധാന കഥാപാത്രമായി എത്തുന്ന 'നന്‍പകല്‍ നേരത്ത് മയക്കം' ഷൂട്ടിംഗ് പൂര്‍ത്തീകരിച്ചു. ഇന്നലെയാണ് ചിത്രീകരണം പൂര്‍ത്തിയായത്. ഒറ്റ ഷെഡ്യൂളില്‍ തന്നെ ചിത്രം പൂര്‍ത്തീകരിച്ചു. ഈ ചിത്രം നിര്‍മിക്കുന്നത് മമ്മൂട്ടി കമ്പനിയും ഒപ്പം ലിജോ ജോസ് പെല്ലിശേരിയുടെ ആമേന്‍ മുവി മൊണാസ്ട്രിയുമാണ്. കന്യാകുമാരിയില്‍ നിന്ന് തുടങ്ങി കഴിഞ്ഞ ദിവസം പഴനിയില്‍ ചിത്രീകരണം അവസാനിക്കുമ്പോള്‍ ലിജോ മമ്മൂട്ടി കോമ്പിനേഷനില്‍ പുറത്തിറങ്ങുന്ന ചിത്രം കാണാന്‍ വളരെ ആകാംക്ഷയോടെയാണ് പ്രേക്ഷകരും കാത്തിരിക്കുന്നത്. രമ്യ പാണ്ട്യന്‍ ആണ് മമ്മൂട്ടിയോടൊപ്പം അഭിനയിക്കുന്നത്. ലിജോ പെല്ലിശേരിയുടെ തന്നെ കഥയ്ക്ക് എസ്. ഹരീഷാണ് തിരക്കഥയും സംഭാഷണവും. മമ്മൂട്ടിക്കൊപ്പം അശോകനും ചിത്രത്തിലുണ്ട്. പേരന്‍പ്, കര്‍ണന്‍, പുഴു എന്നീ സിനിമകള്‍ക്ക് ക്യാമറ ചലിപ്പിച്ച തേനി ഈശ്വറാണ് ക്യാമറ. 'ചുരുളി'യിലെ തെറിവിളികളെക്കുറിച്ച് സമൂഹ മാധ്യമങ്ങളിലൂടെ ഏറെ വിമര്‍ശനങ്ങള്‍ ഏറ്റുവാങ്ങയ സംവിധായകനാണ് ലിജോ. സിനിമയിലെ തെറി വിളിയില്‍ പ്രതികരണവുമായി സെന്‍സര്‍ ബോര്‍ഡ് രംഗത്തെത്തിയിരുന്നു. സോണി ലൈവില്‍ പ്രദര്‍ശിപ്പിക്കുന്ന സിനിമയുടെ പതിപ്പ് സര്‍ട്ടിഫൈഡ് അല്ലെന്ന് സെന്‍ട്രല്‍ ബോര്‍ഡ് ഓഫ് ഫിലിം സര്‍ട്ടിഫിക്കേഷന്‍ തിരുവനന്തപുരം റീജിയണല്‍ ഓഫീസര്‍ വ്യക്തമാക്കിയിരുന്നു.