അനശ്വര രാജന്‍ ചിത്രം ‘സൂപ്പര്‍ ശരണ്യ’; ഫസ്റ്റ് ലുക്ക് പോസ്റ്റര്‍ പുറത്ത്

അനശ്വര രാജന്‍ കേന്ദ്ര കഥാപാത്രമായെത്തുന്ന ചിത്രം 'സൂപ്പര്‍ ശരണ്യ'യുടെ ഫസ്റ്റ് ലുക്ക് പോസ്റ്റര്‍ പുറത്തുവിട്ടു. പോസ്റ്റര്‍ അനശ്വര രാജന്‍ തന്റെ ഫേസ്ബുക്കില്‍ പങ്കുവച്ചു. 'തണ്ണീര്‍മത്തന്‍ ദിനങ്ങള്‍'ക്ക് ശേഷം ഗിരീഷ് എ ഡി സംവിധാനം ചെയ്യുന്ന ചിത്രമാണ് സൂപ്പര്‍ ശരണ്യ. ക്യാമ്പസും കുടുംബവും കോര്‍ത്തിണക്കിയുള്ള ഒരു എന്റര്‍ടെയ്നറായിരിക്കും സൂപ്പര്‍ ശരണ്യ. അര്‍ജുന്‍ അശോകനാണ് ചിത്രത്തില്‍ നായകനായി എത്തുന്നത്. വിനീത് വിശ്വം, നസ്ലന്‍, ബിന്ദു പണിക്കര്‍, ശ്രീകാന്ത് വെട്ടിയാര്‍, സ്നേഹ ബാബു, ജ്യോതി വിജയകുമാര്‍, അരവിന്ദ് ഹരിദാസ് തുടങ്ങിയവരും മറ്റ് കഥാപാത്രങ്ങളെ അവതരിപ്പിക്കും. സൂപ്പര്‍ ശരണ്യയുടെ രചനയും സംവിധാനവും സഹനിര്‍മ്മാണവും നിര്‍വ്വഹിക്കുന്നത് ഗിരീഷ് തന്നെയാണ്. ഛായാഗ്രാഹകന്‍ സജിത്ത് പുരുഷനാണ്. ആകാശ് വര്‍ഗീസ് എഡിറ്റിംഗ് നിര്‍വ്വഹിക്കുന്ന ചിത്രത്തിന് സംഗീത സംവിധായകന്‍ ജസ്റ്റിന്‍ വര്‍ഗീസാണ്. ഷെബിന്‍ പ്രൊഡക്ഷന്‍സിന്റെ ബാനറില്‍ ഷെബിന്‍ ബെക്കറും ഗിരീഷും ചേര്‍ന്നാണ് ചിത്രം നിര്‍മ്മിക്കുന്നത്.