മഹേഷ് നാരായണന്‍-ഫഹദ് ഫാസില്‍ ചിത്രം ‘ഷെര്‍ലോക്’; ചിത്രീകരണം ജനുവരിയില്‍

എംടി വാസുദേവന്‍ നായരുടെ ആറ് കഥകള്‍ കോര്‍ത്തിണക്കിയൊരുങ്ങുന്ന ആന്തോളജിയില്‍ മഹേഷ് നാരായണന്‍ സംവിധാനം ചെയ്യുന്നത് 'ഷെര്‍ലോക്' എന്ന ചെറുകഥ. ചിത്രത്തിന്റെ ഷൂട്ടിങ് ജനുവരിയില്‍ കാനഡയില്‍ ആരംഭിക്കും. ഫഹദ് ഫാസിലാണ് കേന്ദ്ര കഥാപാത്രത്തെ അവതരിപ്പിക്കുക. ഫഹദിന്റെ ബാലു എന്ന കഥാപാത്രത്തിന്റെ സഹോദരിയായി നാദിയ മൊയ്തുവും ചിത്രത്തില്‍ എത്തും. 1990കളില്‍ നടക്കുന്ന കഥയാണ് ഷെര്‍ലോക്. കഥയിലെ പ്രധാന കഥപാത്രം ഷെര്‍ലോക് എന്നു പേരുള്ള പൂച്ചയാണ്. ബാലു എന്ന കഥാപാത്രം ജോലി തേടി കാനഡയില്‍ സഹോദരിയുടെ അടുത്തെത്തുന്നു. അവിടെ സഹോദരിയുടെ വളര്‍ത്തു പൂച്ചയാണ് ഷെര്‍ലോക്. പിന്നീട് പൂച്ച തന്റെ ജീവിതത്തില്‍ തടസമാണെന്ന് ബാലുവിന് ഉണ്ടാകുന്ന തോന്നലും തുടര്‍ന്നുള്ള സംഭവ വികാസങ്ങളുമാണ് ഷെര്‍ലോക് എന്ന ചെറുകഥ. നെറ്റിഫ്ളിക്സാണ് എംടിയുടെ പത്ത് കഥകളെ ആന്തോളജിയായി ഒരുക്കുന്നത്. 30 മിനിറ്റ് ദൈര്‍ഘ്യമുള്ള 10 ഭാഗങ്ങളായിട്ടാണ് നെറ്റ്ഫ്‌ലിക്‌സ് ആന്തോളജി എത്തുക. അവയില്‍ ഷെര്‍ലോക് ഉള്‍പ്പെടെ ഏഴ് ഭാഗങ്ങളാണ് ഇതുവരെ പ്രഖ്യാപിച്ചത്. ഫഹദിന് പുറമെ മോഹന്‍ലാല്‍, മമ്മൂട്ടി, ബിജു മേനോന്‍, ആസിഫ് അലി എന്നിവരും ആന്തോളജിയില്‍ അണിനിരക്കുന്നുണ്ട്. പ്രിയദര്‍ശന്‍, ലിജോ ജോസ് പെല്ലിശ്ശേരി, ജയരാജ്, സന്തോഷ് ശിവന്‍ എന്നിവരാണ് മറ്റ് സംവിധായകര്‍. മാലിക്ക് എന്ന ചിത്രത്തിന് ശേഷം ഫഹദ് ഫാസിലും മഹേഷ് നാരായണനും ഒന്നിക്കുന്ന ചിത്രമാണ് ഷെര്‍ലോക്. ഇരുവരുടെയും നാലാമത്തെ ചിത്രം കൂടിയാണിത്. ടേക്ക് ഓഫ്, സീ യു സൂണ്‍, മാലിക് എന്നീ ചിത്രങ്ങള്‍ ഇരുവരും ഒന്നിച്ചെത്തിയ മറ്റ് സിനിമകള്‍.