നിങ്ങള്‍ക്കും സൂപ്പര്‍ഹീറോ ആകാം; ‘മിന്നല്‍ മുരളി’ ഗെയിം എത്തുന്നു

മലയാള സിനിമാപ്രേമികളേറെ കാത്തിരിക്കുന്ന ചിത്രമാണ് ടൊവിനോ തോമസ് നായകനാകുന്ന മിന്നല്‍ മുരളി. ഇപ്പോഴിതാ സിനിമയുടെ പ്രൊമോഷനുമായി ബന്ധപ്പെട്ട് ഗെയിമുമായി എത്തിയിരിക്കുകയാണ് നിര്‍മ്മാതാക്കള്‍. 'മിന്നല്‍ മുരളി' എന്ന് തന്നെയാണ് ഗെയിമിന്റെ പേര്.കാര്‍മോണ്ട് ഇന്‍ഫിനിറ്റി എന്ന സ്ഥാപനമാണ് ഗെയിം ഒരുക്കിയിരിക്കുന്നത്. ഗെയിം ആന്‍ഡ്രോയ്ഡിലും ഐഒഎസിലും ഉടന്‍ എത്തുമെന്നും അണിയറക്കാര്‍ അറിയിക്കുന്നു. ബേസില്‍ ജോസഫും ഗെയിം എത്തുന്നതിന്റെ സന്തോഷം സമൂഹ മാധ്യമങ്ങളിലൂടെ പങ്കുവെച്ചിട്ടുണ്ട്. മലയാളത്തിലെ ആദ്യ സൂപ്പര്‍ ഹീറോ ചിത്രമായ മിന്നല്‍ മുരളി 24ന് നെറ്റ്ഫല്‍ക്സിലൂടെ പ്രദര്‍ശനത്തിനെത്തും. അതിന് മുമ്പ് ജിയോ മാമി ഫിലിം ഫെസ്റ്റിവലിലൂടെ ചിത്രം വേള്‍ഡ് വൈഡായി റിലീസ് ചെയ്യും. ഇന്നലെയാണ് ഇതു സംബന്ധിച്ച പ്രഖ്യാപനം ബോളിവുഡ് താരവും ജിയോ മാമി ചെയര്‍പേഴ്സണുമായ പ്രയങ്ക ചോപ്ര നടത്തിയത്.അജു വര്‍ഗീസ്, ഹരിശ്രീ അശോകന്‍, ബൈജു, ഫെമിന എന്നിവരാണ് ചിത്രത്തിലെ മറ്റ് പ്രധാന കഥാപാത്രങ്ങള്‍. ജിഗര്‍തണ്ട, ജോക്കര്‍ തുടങ്ങിയ ചിത്രങ്ങളിലൂടെ പ്രശസ്തനായ ഗുരു സോമസുന്ദരവും മിന്നല്‍ മുരളിയില്‍ ശ്രദ്ധേയമായ കഥാപാത്രത്തെ അവതരിപ്പിക്കുന്നുണ്ട്. സമീര്‍ താഹിറാണ് ചിത്രത്തിനായി ക്യാമറ ചലിപ്പിക്കുന്നത്. ഷാന്‍ റഹ്മാന്‍ സംഗീത സംവിധാനം നിര്‍വഹിക്കുന്നു.സംഘട്ടനരംഗങ്ങള്‍ സംവിധാനം ചെയ്തിരിക്കുന്നത് ബാറ്റ്മാന്‍, ബാഹുബലി, സുല്‍ത്താന്‍ തുടങ്ങിയ ചിത്രങ്ങള്‍ക്കു പിന്നില്‍ പ്രവര്‍ത്തിച്ച വ്ലാഡ് റിംബര്‍ഗ് ആണ്. കലാസംവിധാനം മനു ജഗത്.ചിത്രത്തിന്റെ രചന നിര്‍വഹിച്ചിരിക്കുന്നത് അരുണ്‍ അനിരുദ്ധന്‍, ജസ്റ്റിന്‍ മാത്യു എന്നിവര്‍ ചേര്‍ന്നാണ് . വിഎഫ്എക്സിനും ഏറെ പ്രാധാന്യമുള്ള ചിത്രത്തിന്റെ വിഎഫ്എക്സ് സൂപ്പര്‍വൈസര്‍ ആന്‍ഡ്രൂ ഡിക്രൂസ് ആണ്. ഗോദയ്ക്ക് ശേഷം ടൊവിനോയും ബേസില്‍ ജോസഫും ഒരുമിക്കുന്ന ചിത്രമാണ് മിന്നല്‍ മുരളി. വീക്കെന്‍ഡ് ബ്ലോക്ക്ബസ്റ്റേഴ്സിന്റെ ബാനറില്‍ സോഫിയ പോള്‍ ആണ് നിര്‍മ്മാണം.