പുഷ്പ പ്രദര്‍ശിപ്പിക്കരുത്; തിയേറ്റര്‍ ഉടമകളും വിതരണക്കാരും രണ്ട് തട്ടില്‍

സിനിമ മേഖല വീണ്ടും പ്രതിസന്ധിയിലേക്ക്. തിയേറ്റര്‍ ഉടമകളും നിര്‍മ്മാതാക്കളും വിതരണക്കാരും രണ്ട് തട്ടില്‍. പുഷ്പ എന്ന തെലുങ്ക് സിനിമയുടെ റിലീസുമായി ബന്ധപ്പെട്ടാണ് അനിശ്ചിതത്വം തുടരുന്നത്.പുഷ്പ ഡിസംബര്‍ 17നാണ് റിലീസ് ചെയ്യുന്നത്. അന്യഭാഷായ ചിത്രങ്ങള്‍ക്ക് 50 ശതമാനം ഷെയര്‍ നല്‍കാനാണ് ഫിയോക്കിന്റെ തീരുമാനം. എന്നാല്‍ രജനികാന്ത് അജിത്ത് തുടങ്ങിയ മുന്‍നിര താരങ്ങളുടെ സിനിമകള്‍ക്ക് 55 ശതമാനം വരെ നല്‍കാനും തയ്യാറാണ്. പുഷ്പയ്ക്കും 55 ശതമാനം ഷെയര്‍ നല്‍കണമെന്നാണ് നിര്‍മ്മാതാക്കളും വിതരണക്കാരും ആവശ്യപ്പെടുന്നത്. ഈ തുക നല്‍കില്ല എന്ന ഫിയോക്കിന്റെ തീരുമാനം. പുഷ്പ പ്രദര്‍ശിപ്പിക്കരുത്. അതിന്റെ ഫാന്‍സ് ഷോ ഉള്‍പ്പടെ കളിക്കരുത് എന്നാണ് ഫിയോക്ക് തങ്ങളുടെ അംഗങ്ങള്‍ക്ക് വാട്ട്‌സാപ്പ് സന്ദേശത്തിലൂടെ നല്‍കിയ നിര്‍ദേശം. ഇത്തരം പ്രവണത നമ്മളെ തന്നെ നശിപ്പിക്കുന്നതിന് തുല്യമാണ് എന്ന നിലപാടിലാണ് ഫിയോക്ക്. 'പ്രിയ അംഗങ്ങളെ, പുഷ്പ എന്ന സിനിമയുടെ ഫാന്‍സ് ഷോയുമായി ബന്ധപ്പെട്ട് പല തിയേറ്ററുകളുടെ പേരും ചേര്‍ത്ത് പോസ്റ്ററുകള്‍ പ്രത്യക്ഷപ്പെടുന്നുണ്ട്. ഇത് ഫേക്കാണ്. സംഘടനയുടെ ആവശ്യങ്ങള്‍ ഇത് വരെ അംഗീകരിക്കപ്പെട്ടിട്ടില്ല. അതിനാല്‍ ആരും ചിത്രം പ്രദര്‍ശിപ്പിക്കരുത്', എന്നാണ് ഫിയോക്കിന്റെ സന്ദേശം. സന്ദേശത്തിന്റെ കോപ്പി റിപ്പോര്‍ട്ടര്‍ ലൈവിന് ലഭിച്ചിട്ടുണ്ട്. ഈ സാഹചര്യത്തില്‍ അടിയന്തരമായി കൊച്ചിയില്‍ നിര്‍മ്മാതാക്കളുടെയും വിതരണക്കാരുടെയും സംഘടനകള്‍ യോഗം ചേര്‍ന്നു. പുഷ്പ കളിക്കാത്ത പക്ഷം മറ്റൊരു സിനിമയും തിയേറ്ററുകള്‍ക്ക് നല്‍കില്ല എന്നാണ് യോഗത്തിന് ശേഷമുള്ള തീരുമാനം.