”ആവേശം വന്നാല്‍ പിന്നെ നടുറോഡിലും വണ്ടി നിര്‍ത്തി എഴുതും’; ബ്രോ ഡാഡി ഓര്‍മ്മകള്‍ പങ്കുവച്ച് പൃഥ്വിരാജ്

മോഹന്‍ലാല്‍ പൃഥ്വിരാജ് കൂട്ടുകെട്ടില്‍ ഒരുങ്ങിയ 'ബ്രോ ഡാഡി'ക്കായുള്ള കാത്തിരിപ്പിലാണ് പ്രേക്ഷകര്‍. ലൂസിഫറിന് ശേഷം പൃഥ്വിരാജിന്റെ മറ്റൊരു ഹിറ്റ് പ്രതീക്ഷിക്കുന്ന ചിത്രത്തിന്റെ ഓര്‍മ്മകള്‍ പങ്കുവെച്ചിരിക്കുകയാണ് പൃഥ്വിരാജ്. റോഡില്‍ വണ്ടി നിര്‍ത്തി, എന്തൊ എഴുതുന്ന ചിത്രമാണ് പൃഥ്വി സോഷ്യല്‍ മീഡിയയില്‍ പോസ്റ്റ് ചെയ്തിരിക്കുന്നത്. താഴെ അടിക്കുറിപ്പില്‍, 'റോഡിന് നടുവില്‍ വച്ച് പ്രചോദനം ലഭിക്കുമ്പോള്‍ നിങ്ങള്‍ വണ്ടി നിര്‍ത്തും, എഴുതും. ബ്രോ ഡാഡി ദിനങ്ങള്‍,' എന്നും കുറിച്ചു. സിനിമയുമായി ബന്ധപ്പെട്ട് വരുന്ന വാര്‍ത്തകള്‍ തുടക്കം മുതലേ പ്രേക്ഷകര്‍ സ്വീകരിച്ചു കഴിഞ്ഞു. ഇതിനു പിന്നാലെയാണ് ഈ പോസ്റ്റും വയറലാകുന്നത്. 'ബ്രോ ഡാഡി' ചിത്രം ഒടിടി റിലീസ് ആകുമെന്നാണ് റിപ്പോര്‍ട്ട്. ബ്രോ ഡാഡി ചെയ്യാനുള്ള കാരണം നേരത്തെ മോഹന്‍ലാല്‍ വ്യക്തമാക്കിയിരുന്നു. പൃഥ്വിരാജ് മോഹന്‍ലാല്‍ കോംബോ എന്നു കേള്‍ക്കുമ്പോള്‍ പ്രേക്ഷകര്‍ക്ക് ഓര്‍മ്മ വരുന്നത് ലൂസിഫര്‍ എന്ന ഹിറ്റ് ചിത്രമാണ്. അത് ബ്രോ ഡാഡി കാണാന്‍ പ്രേക്ഷകരെ പ്രേരിപ്പിക്കും. അത് തന്നെയാണ് സിനിമ ചെയ്യാനുള്ള പ്രധാന കാരണമെന്നാണ് മോഹന്‍ലാല്‍ പറഞ്ഞത്. പൃഥ്വിരാജിന്റെ സംവിധാനത്തില്‍ ഒരുങ്ങുന്ന ചിത്രത്തില്‍ താരവും പ്രധാന വേഷം ചെയ്യുന്നുണ്ട്. മോഹന്‍ലാലിന്റ മകന്റെ കഥാപാത്രത്തെയാണ് പൃഥ്വി അവതരിപ്പിക്കുന്നത്. കൂടാതെ ചിത്രത്തില്‍ മീന, കനിഹ, കല്യാണി പ്രിയദര്‍ശന്‍, ലാലു അലക്സ്, ജഗദീഷ്, സൗബിന്‍ എന്നിങ്ങനെ വമ്പന്‍ താരനിരയാണ് അണിനിരക്കുന്നത്. ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂരാണ് ചിത്രം നിര്‍മ്മിക്കുന്നത്. സംഗീതം ദീപക് ദേവിന്റെയാണ്. ശ്രീജിത്ത് ബിബിന്‍ തിരിക്കഥ നിര്‍വ്വഹിച്ച ചിത്രം ഒരു ഫാമലി ഡ്രാമയാണ്.