‘ഈ സെഞ്ചുറി തലൈവര്‍ക്ക്’; രജിനികാന്തിന് പിറന്നാള്‍ സമ്മാനം നല്‍കി വെങ്കിടേഷ് അയ്യര്‍

വിജയ് ഹസാരെ ട്രോഫിയില്‍ മധ്യപ്രദേശിനു വേണ്ടി വെങ്കിടേഷ് അയ്യര്‍ നേടിയ സെഞ്ചുറി ജന്മദിനം ആഘോഷിക്കുന്ന രജിനികാന്തിന് സമര്‍പ്പിച്ചു. രജിനികാന്തിന്റെ കടുത്ത ആരാധകനായ വെങ്കിടേഷ് അയ്യര്‍ ഇന്ത്യന്‍ ഓള്‍റൗണ്ടറാണ്. ചണ്ഡിഗഢിനെതിരെ ഞായാറാഴ്ച നടന്ന മത്സരത്തിലാണ് അയ്യര്‍ സെഞ്ചുറി നേടിയത്. ഇതാണ് തലൈവരുടെ 71-ാം ജന്മ ദിനത്തില്‍ സമര്‍പ്പിച്ചത്. സെഞ്ചുറി സമര്‍പ്പിക്കുന്നതിന്റെ വിഡിയോ അയ്യരുടെ ഐപിഎല്‍ ടീമായ കൊല്‍ക്കത്ത നൈറ്റ് റൈഡേഴ്സ് ഔദ്യോഗിക ട്വിറ്റര്‍ ഹാന്‍ഡിലില്‍ പങ്കുവെച്ചിട്ടുണ്ട്. 113 പന്തില്‍ 151 റണ്‍സ് നേടിയ താരം രജിനികാന്തിന്റെ പ്രശസ്തമായ സല്യൂട്ട് ചെയ്തും തലപ്പാവിന്റെ ആംഗ്യം കാണിച്ചും സമര്‍പ്പിക്കുന്ന വിഡിയോ ഇതിനോടകം തന്നെ പ്രചാരം നേടിക്കഴിഞ്ഞു. രാജ്കോട്ടിലെ സൗരാഷ്ട്ര ക്രിക്കറ്റ് അസോസിയേഷന്‍ സ്റ്റേഡിയത്തില്‍ വച്ചായിരുന്നു ഡി ഗ്രൂപ്പിന്റെ നാലാം റൗണ്ട് മത്സരം. വെങ്കിടേഷ് അയ്യര്‍ ആര്‍ക്കാണ് സെഞ്ചുറി സമര്‍പ്പിക്കുന്നതെന്ന് മനസ്സിലാക്കാനാകുമോയെന്ന ചോദ്യത്തോടെയാണ് ദൃശ്യം ട്വിറ്ററില്‍ പോസ്റ്റ് ചെയ്തിരിക്കുന്നത്. തമിഴ് സിനിമയുടെ അഹങ്കാരമായ നടന്‍ രജിനികാന്തിന്റെ കടുത്ത ആരാധകന്‍ കൂടിയാണ് അയ്യര്‍. മുന്‍പും പല അഭിമുഖങ്ങളിലും താരം തന്റെ തലൈവര്‍ ഇഷ്ടം പ്രകടിപ്പിച്ചിരുന്നു. 2021 ല്‍ അയ്യര്‍ ടീമിനായി 370 റണ്‍സ് നേടിയിരുന്നു. 26 കാരനായ താരം ഇന്ത്യന്‍ ജേഴ്സിയില്‍ മൂന്നു മത്സരങ്ങളാണ് കളിച്ചിട്ടുള്ളത്.