‘അത് വളരെ മനോഹരമായിരുന്നു, ആ രംഗം അത് അവസാനിച്ചതില്‍ നിരാശ തോന്നി’; ‘ടൈറ്റാനിക്കി’ലെ പ്രണയ രംഗങ്ങളെ കുറിച്ച് കേറ്റ് വിന്‍സ്ലെറ്റ്

ഹോളിവുഡിലെ ഏറ്റവും മനോഹരമായ പ്രണയചിത്രം എന്ന ടൈറ്റില്‍ നേടിയ എവര്‍ ഗ്രീന്‍ സിനിമയാണ് 'ടൈറ്റാനിക്ക്'. ജാക്കും റോസും തമ്മിലുള്ള തീവ്ര പ്രണയത്തെ പിന്തള്ളാന്‍ ഇന്നുവരെ മറ്റൊരു സിനിമയ്ക്കും സാധിച്ചിട്ടില്ല എന്ന് തന്നെ പറയാം. സിനിമയ്ക്കുള്ളില്‍ പ്രണയ ജോഡികളാണെങ്കിലും ഇന്നും ലിയാനാഡോ ഡി കാപ്രിയോയും കാറ്റ് വിന്‍സ്ലെറ്റും അവരുടെ സൗഹൃദം കാത്തു സൂക്ഷിക്കുന്നവരാണ്. സിനിമ പുറത്തിറങ്ങി വര്‍ഷങ്ങള്‍ 24 വര്‍ഷങ്ങള്‍ പിന്നിടുമ്പോഴും ചിത്രത്തിലെ പല രംഗങ്ങളും ഇപ്പോഴും ചര്‍ച്ചയാകാറുണ്ട്. ടൈറ്റാനിക്കിലെ നായികയായ കേറ്റ് വിന്‍സ്ലെറ്റ് അടുത്തിടെ നടന്ന അഭിമുഖത്തിലും ഡികാപ്രിയോയുമായുള്ള പ്രണയ രംഗങ്ങളെ കുറിച്ചും ആ രംഗങ്ങള്‍ അഭിനയിക്കുമ്പോഴുണ്ടായ അനുഭവവും കേറ്റ് വിന്‍സ്ലെറ്റ് പറഞ്ഞു. 'സിനിമയിലും ജാക്കും റോസുമായുള്ള അഭിനയം ഏറ്റവും മനോഹരമായ അനുഭവമായിരുന്നു, നിരവധി പ്രണയ രംഗങ്ങളുള്ള ചിത്രമായിരുന്നു ടൈറ്റാനിക്. ആ രംഗങ്ങളില്‍ പ്രേക്ഷകര്‍ കണ്ടത് കഥാപാത്രങ്ങളെ മാത്രമാണ്. അതൊരിക്കലും ഞങ്ങള്‍ ആയിരുന്നില്ല. കഥാപാത്രങ്ങള്‍ക്ക് ചെയ്യാനുണ്ടായിരുന്നത് മാത്രമാണ് തങ്ങള്‍ ചെയ്തത്. യഥാര്‍ത്ഥത്തില്‍ ഞാന്‍ അവതരിപ്പിച്ച റോസ് എന്ന കഥാപാത്രം ഡികാപ്രിയോയുടെ ജാക്കുമായി പ്രണയത്തിലായി കഴിഞ്ഞിരുന്നു. ഡികാപ്രിയോയുമായി എനിക്ക് പരിശുദ്ധമായ ബന്ധമാണുള്ളത്. അദ്ദേഹത്തിനൊപ്പം ആ രംഗങ്ങളില്‍ അഭിനയിക്കാന്‍ കഴിഞ്ഞത് മനോഹരമായ അനുഭവമായിരുന്നു. സിനിമയിലെ വൈകാരിക രംഗങ്ങള്‍ വളരെ മനോഹരമായിരുന്നു. ആ രംഗങ്ങള്‍ കഴിഞ്ഞ് ക്യാമറ നിര്‍ത്തിയ ഉടനെ അദ്ദേഹം നേരെ നിന്ന് നടന്നു പോയി. ആ രംഗം കഴിഞ്ഞു. അത് അവസാനിച്ചതില്‍ നിരാശ തോന്നി' കേറ്റ് പറഞ്ഞു.