ഭാര്യയെ പങ്കുവയ്ക്കാന്‍ തയ്യാറെന്ന് പരസ്യം നല്‍കിയ യുവാവ് അറസ്റ്റില്‍

ഭാര്യയെ പങ്കുവയ്ക്കാന്‍ തയ്യാറാണെന്ന് കാണിച്ച് ഇന്റര്‍നെറ്റില്‍ പരസ്യം നല്‍കിയ യുവാവിനെ ബെംഗളൂരു പൊലീസ് അറസ്റ്റ് ചെയ്തു. ഇലക്ട്രിക്കല്‍ ഷോപ്പ് സെയില്‍സ്മാനായ വിനയ് കുമാര്‍(28) എന്നയാളെയാണ് അറസ്റ്റ് ചെയ്തത്. ഐ.ടി. ആക്ട് പ്രകാരമാണ് വിനയ് കുമാറിന്റെ അറസ്റ്റ്.ഭാര്യയെ കൈമാറ്റം ചെയ്യുന്നതിനെക്കുറിച്ച് വിനയ് സോഷ്യല്‍മീഡിയയിലൂടെ സ്ഥിരമായി മെസേജുകള്‍ അയക്കാറുണ്ടായിരുന്നതായി പൊലീസ് പറഞ്ഞു. ''താല്‍പര്യമുള്ളവര്‍ തുടര്‍ന്നുള്ള ഇടപാടുകള്‍ ടെലഗ്രാം വഴിയാണ് നടത്തിയിരുന്നത്. സമ്മതമാണെങ്കില്‍ വീട്ടിലേക്ക് ക്ഷണിക്കും'' സൗത്ത് ഈസ്റ്റ് ഡിസിപി ശ്രീനാഥ് മഹാദേവ് ജോഷി പറഞ്ഞു. സമൂഹ മാധ്യമങ്ങളില്‍ സ്ത്രീയുടെ പേരില്‍ വ്യാജ അക്കൗണ്ടുകളുണ്ടാക്കിയാണ് പരസ്യം നല്‍കിയിരുന്നത്.ട്വിറ്റര്‍ വഴി ഇടപാടുകാരെ ലഭിച്ചതായും പൊലീസ് പറയുന്നു. അശ്ലീല വീഡിയോകള്‍ക്ക് അടിമയായ വിനയ് കുമാര്‍ ഭാര്യയെയും കാണാന്‍ പ്രേരിപ്പിച്ചിരുന്നുവെന്ന് പൊലീസ് പറഞ്ഞു. ഒരു വയസുള്ള മകനും ഇവര്‍ക്കുണ്ട്.