പള്‍സര്‍സുനി മറ്റൊരു പ്രമുഖ നടിയെയും സമാന രീതിയില്‍ പീഡിപ്പിച്ചു ; ഈ കേസ്സിലും അന്വേഷണം ഉണ്ടാകും

യുവനടിയെ തട്ടിക്കൊണ്ടു പോയ കേസിലെ പ്രതി പള്‍സര്‍ സുനി മുമ്പ് മലയാളത്തിലെ മറ്റൊരു പ്രമുഖ നടിയെയും സമാന രീതിയില്‍ പീഡിപ്പിച്ച് ദൃശ്യങ്ങള്‍ പകര്‍ത്തിയിരുന്നതായി റിപ്പോര്‍ട്ട്. ചോദ്യം ചെയ്യലില്‍ നിന്നും കിട്ടിയ ഈ വിവരത്തിന്റെ അടിസ്ഥാനത്തില്‍ രണ്ടു വര്‍ഷം മുമ്പ് നടന്ന ഈ സംഭവത്തെ കുറിച്ചും പോലീസ് അന്വേഷണത്തിനൊരുങ്ങുന്നതായിട്ടാണ് റിപ്പോര്‍ട്ട്. ഈ സംഭവങ്ങള്‍ക്ക് പുതിയ കേസുമായി ബന്ധമുണ്ടോ എന്ന് അന്വേഷിക്കാനാണ് ഒരുങ്ങുന്നത്.

നടിയെ പീഡിപ്പിക്കുകയും ദൃശ്യങ്ങള്‍ പകര്‍ത്തുകയും ചെയ്തിരുന്നു. സിനിമാ മേഖലയിലെ പലര്‍ക്കും അറിവുള്ള ഈ കാര്യത്തില്‍ ഇരയായ നടി മാനഹാനി ഭയന്നു പരാതി നല്‍കാതിരിക്കുകയായിരുന്നു. ഒരു നടന്റെ ഡ്രൈവറായി സുനി ജോലി ചെയ്തിരുന്ന കാലത്തായിരുന്നു ഈ സംഭവം. ഇതോടെ നടന്‍സുനിയെ ഡ്രൈവര്‍ സ്ഥാനത്തു നിന്നും നീക്കം ചെയ്യുകയുമുണ്ടായി.

ഭാര്യയോട് മോശമായി പെരുമാറി എന്ന് വ്യക്തമാക്കി വേറൊരു നടിയുടെ നിര്‍മ്മാതാവായ ഭര്‍ത്താവ് സുനിക്കെതിരേ നേരത്തേ പോലീസില്‍ പരാതി നല്‍കിയിരുന്നു. ഇപ്പോഴത്തെ കേസില്‍ പോലീസിന് ലഭിച്ച തെളിവുകളുടെ അടിസ്ഥാനത്തില്‍ ഈ രണ്ടു കേസും അന്വേഷിക്കാനുള്ള നിലപാടിലാണ്.