നടിയെ ആക്രമിച്ച സംഭവത്തില്‍ കൂടുതല്‍ അറസ്റ്റിന് സാധ്യത ; ഒന്നും അറിയില്ലെന്ന് പറഞ്ഞവര്‍ കുടുങ്ങും

നടിയെ ആക്രമിച്ച സംഭവത്തില്‍ കൂടുതല്‍ അറസ്റ്റിന് സാധ്യത. ഇപ്പോഴിതാ, സംഭവത്തില്‍ ദിലീപിന്റെ അനുജന്‍ അനൂ‍പിനും സംവിധായകന്‍ നാദിര്‍ഷായ്ക്കും പങ്കുള്ളതായി സൂചനകള്‍. ഇതിന്റെ അടിസ്ഥാനത്തില്‍ ഇരുവരെയും പൊലീസ് വീണ്ടും ചോദ്യം ചെയ്യുമെന്നാണ് റിപ്പോര്‍ട്ട്‌.

ജയിലില്‍ നിന്നും പള്‍സര്‍ സുനി എഴുതിയ കത്ത് കൈമാറിയത് അനൂപിനാണെന്ന വ്യക്തമായതോടെയാണ് ഇരുവരേയും വീണ്ടും ചോദ്യം ചെയ്യാന്‍ പൊലീസ് തയ്യാറാകുന്നത്. അതോടൊപ്പം, തെളിവുകള്‍ നശിപ്പിക്കാന്‍ കൂട്ടുനിന്നുവെന്ന ആരോപണവും ഇവര്‍ക്കെതിരെ ഉണ്ട്. ഗൂഢാലോചനയില്‍ ഇരുവര്‍ക്കും പങ്കുണ്ടോ എന്നും പൊലീസ് അന്വേഷിക്കും.

തെളിവു നശിപ്പിക്കാന്‍ ശ്രമിച്ചുവെന്നാണ് ഇരുവര്‍ക്കുമെതിരെയുള്ള കുറ്റം. കുറ്റകൃത്യത്തെ പറ്റി അറിവുണ്ടായിട്ടും പൊലീസിനെ അറിയിക്കാര്‍ ശ്രമിക്കാതെ മറച്ചു പിടിച്ചുവെന്ന കുറ്റവും ഇവര്‍ക്കെതിരെ ചുമത്തും. സംഭവം വഴിതിരിച്ചു വിടാന്‍ ദിലീപിനെ ഇരുവരും സഹായിച്ചെന്നും പൊലീസ് കണ്ടെത്തിയിട്ടുണ്ട്. നേരത്തെ, നാദിര്‍ഷയെ പ്രതിയാക്കില്ലെന്നായിരുന്നു പൊലീസ് പറഞ്ഞിരുന്നത്.

പ്രതികളെ ഒതുക്കാന്‍ നാദിര്‍ഷയും ദിലീപിന്റെ മാനേജന്‍ അപ്പുണ്ണിയും ശ്രമിച്ചുവെന്ന് കണ്ടെത്തിയിട്ടുണ്ട്. ആദ്യം ചോദ്യം ചെയ്തപ്പോള്‍ തനിക്കൊന്നും അറിയില്ലെന്നായിരുന്നു നാദിര്‍ഷായുടെ ഉത്തരം. എന്നാല്‍, ഇനി എന്ത് പറഞ്ഞ് പിടിച്ചു നില്‍ക്കുമെന്ന് കണ്ടറിയാം.