ദിലീപിന്റെ റിയല്‍ എസ്‌റ്റേറ്റ് ബന്ധങ്ങള്‍ പരിശോധിക്കും

ദിലീപിന്റെ റിയല്‍ എസ്‌റ്റേറ്റ് ഇടപാടുകള്‍ സംബന്ധിച്ച വിവരം സാമ്പത്തിക കുറ്റാന്വേഷണ വിഭാഗവും അന്വേഷിച്ചു തുടങ്ങി. ഗൂഡാലോചനയില്‍ പോലീസ് കണ്ടെത്തിയ നിര്‍ണ്ണായക വിവരങ്ങളിലാണ് അന്വേഷണം ആരംഭിച്ചിരിക്കുന്നത്. താരത്തിന്റെ സിനിമകള്‍, റിയല്‍ എസ്‌റ്റേറ്റ്, ബിസിനസ് സംരംഭങ്ങള്‍ എന്നിവയുടെ സാമ്പത്തിക സ്രോതസ് കണ്ടെത്താനാണ് ശ്രമം.

നികുതി റിട്ടേണില്‍ കൂടുതല്‍ വരുമാനം താരത്തിനുണ്ടോയെന്ന് ആദായ നികുതി വകുപ്പ് അന്വേഷിക്കും. അന്വേഷണത്തിന്റെ ഭാഗമായി ദിലീപിന്റെ സ്വത്തുക്കളും ബാങ്ക് അക്കൗണ്ടുകളും മരവിപ്പിക്കുമെന്നും റിപ്പോര്‍ട്ടുണ്ട്. സിനിമാ നിര്‍മ്മാണ രംഗത്ത് ബിനാമി കള്ളപ്പണ ഇടപാടുകളില്‍ ദിലീപിന്റെ പങ്ക് വ്യക്തമായ സാഹചര്യത്തിലാണ് ഇത്. ഗൂഡാലോചന കേസില്‍ അന്വേഷണം പൂര്‍ത്തിയായാല്‍ ഉടന്‍ സാമ്പത്തിക കുറ്റാന്വേഷണ ഏജന്‍സികള്‍ ദിലീപിനെ ചോദ്യം ചെയ്യും. നടിയെ ഉപദ്രവിച്ച കേസിലെ ഗൂഡാലോചന സംബന്ധിച്ച അന്വേഷണത്തിനിടയിലാണ് ദിലീപിന്റെ കണക്കില്‍ പെടാത്ത സ്വത്ത് സംബന്ധിച്ച വിവരങ്ങള്‍ പോലീസിന് ലഭിച്ചത്.