രാജീവ് വധം : അഡ്വ. ഉദയഭാനു ഏഴാം പ്രതി

അങ്കമാലി സ്വദേശിയായ രാജീവ് വധക്കേസിൽ അഡ്വക്കേറ്റ് ഉദയഭാനു ഏഴാം പ്രതി. റിപ്പോർട്ട് പൊലീസ് മുദ്രവച്ച കവറിൽ കോടതിക്ക് കൈമാറി. സംസ്ഥാനത്തെ ഒരു പ്രമുഖ അഭിഭാഷകനും നിയമ പോരാട്ടത്തിന്റെ എല്ലാ തഴക്കങ്ങളും പഴക്കങ്ങളും കൈമുതലായ വ്യക്തിയുമായതിനാൽ കൃത്യമായ തെളിവ് ശേഖരിച്ചതിന് ശേഷമായിരുന്നു അന്വേഷണസംഘം ഉദയഭാനുവിനെ പ്രതി ചേർത്തത്.

രാജീവിന്റെ അങ്കമാലിയിലുള്ള വീട്ടിൽ ഉദയഭാനു നിരവധി തവണ വന്നതിന്റെ സി.സി.ടി.വി ദൃശ്യങ്ങൾ പൊലീസിന് നേരത്തെ തന്നെ ലഭിച്ചിരുന്നു. രാജീവിനെ കാണാതായ ശേഷം അയാള്‍ അബോധാവസ്ഥയിൽ വാടകവീട്ടിലുണ്ടെന്ന വിവരം ഉദയഭാനു പൊലീസിനെ ഫോണിൽ വിളിച്ചു പറഞ്ഞിരുന്നു. ഇത് റെക്കോര്‍ഡ് ചെയ്തതും ഉദയഭാനുവിനെതിരായ തെളിവായി .

വസ്തു ഇടപാടുകള്‍ ആരംഭിച്ചതോടെ രാജീവും ഉദയഭാനുവും നല്ല സുഹൃത്തുക്കളായി മാറിയതിന്റെ തെളിവുകൾ പൊലീസിന് ലഭിച്ചിരുന്നു. അങ്കമാലിയിലെ രാജീവിന്റെ വീട്ടിൽ നിത്യസന്ദർശകനായിരുന്നു ഉദയഭാനുവെന്നും പൊലീസ് പ്പറഞ്ഞു. എന്നാല്‍ കുറച്ചുകാലങ്ങള്‍ക്ക് ശേഷം വസ്തു ഇടപാടിനെ ചൊല്ലി തര്‍ക്കമുണ്ടായതോടെയാണ് ഉദയഭാനുവുമായി രാജീവ് തെറ്റിയതെന്നും പൊലീസ് പറയുന്നു.