മമ്മൂട്ടിയുടെ നായികയായി ഷം‌ന കാസിം

ഷം‌ന കാസിം ഇനി മമ്മൂട്ടിയുടെ നായിക. ഏറെക്കാലമായി സിനിമാരംഗത്തുണ്ടെങ്കിലും, മികച്ച നടിയെന്ന പേരെടുത്തെങ്കിലും, മുന്‍‌നിര നായകന്‍‌മാരുടെ നായികയാകാന്‍ ഷം‌നയ്ക്ക് കഴിഞ്ഞിരുന്നില്ല. ഇപ്പോള്‍ ഷം‌നയുടെ നല്ലകാലം വന്നിരിക്കുകയാണ്.

തിരക്കഥാകൃത്ത് സേതു ആദ്യമായി സംവിധാനം ചെയ്യുന്ന ‘ഒരു കുട്ടനാടന്‍ ബ്ലോഗ്’ എന്ന ചിത്രത്തിലാണ് മമ്മൂട്ടിക്ക് നായികയായി ഷം‌ന എത്തുന്നത്. നീന എന്ന ഒരു പൊലീസ് ഉദ്യോഗസ്ഥയുടെ കഥാപാത്രമാണ് ഷം‌ന ഈ സിനിമയില്‍ അവതരിപ്പിക്കുന്നത്‍.

“മുമ്പും എനിക്ക് പൊലീസ് വേഷങ്ങള്‍ പലരും ഓഫര്‍ ചെയ്തിരുന്നു. എന്നാല്‍ എനിക്ക് ചേരില്ലെന്ന് തോന്നിയതിനാല്‍ അവയൊന്നും സ്വീകരിച്ചില്ല. എന്തായാലും ഇപ്പോള്‍ ഒരു പൊലീസ് കഥാപാത്രം ചെയ്യാന്‍ കഴിയുന്നതില്‍ സന്തോഷമുണ്ട്. ഒരു മികച്ച കഥാപാത്രമാണിത്. ഈ സിനിമയുടേത് നല്ല ഒരു ടീമുമാണ്” - ഷം‌ന പറയുന്നു.

ഹരി എന്ന ബ്ലോഗറായാണ് മമ്മൂട്ടി ഈ സിനിമയില്‍ അഭിനയിക്കുന്നത്. കുട്ടനാട്ടിലെ കൃഷ്ണപുരം എന്ന സാങ്കല്‍പ്പിക ഗ്രാമത്തിലാണ് കഥ നടക്കുന്നത്. റായ് ലക്‍ഷ്മി, അനു സിത്താര എന്നിവരും ഈ സിനിമയില്‍ നായികമാരാണ്. സുരാജ് വെഞ്ഞാറമൂട്, നെടുമുടി വേണു, സിദ്ദിക്ക് എന്നിവര്‍ക്കും ഒരു കുട്ടനാടന്‍ ബ്ലോഗില്‍ മികച്ച കഥാപാത്രങ്ങളെയാണ് അവതരിപ്പിക്കാനുള്ളത്. പ്രദീപ് നായര്‍ ഛായാഗ്രഹണം നിര്‍വഹിക്കുന്ന സിനിമയുടെ നിര്‍മ്മാണം അനന്താ വിഷനാണ്. മാര്‍ച്ച് ആദ്യം ചിത്രീകരണം ആരംഭിക്കും.