കേരള പൊലീസ് ഇനി കൊവിഡ് ബ്രിഗേഡ്

സംസ്ഥാനത്തെ കോവിഡ് പ്രതിരോധത്തിന്റെ ചുമതല ഇന്ന് മുതല്‍ പൊലീസ് ഏറ്റെടുക്കുന്നു. സമ്പര്‍ക്കത്തിലുള്ളവരെ കണ്ടെത്താനും വ്യാപനം തടയാനും വിപുല പദ്ധതികള്‍ തയാറാക്കി. ഒരാഴ്ചകൊണ്ട് രോഗികളുടെ എണ്ണം കുറച്ച് തുടങ്ങുകയാണ് ആദ്യ ലക്ഷ്യമെന്ന് ഡി.ജി.പി. പുതിയ നിര്‍ദേശം പൊലീസിന് ജോലി ഭാരം ഏറുമെന്നും വിവിധ വകുപ്പുകള്‍ തമ്മില്‍ അഭിപ്രായ വ്യത്യാസത്തിനിടയാക്കുമെന്നും ആശങ്കയുണ്ട്. കണ്ടയ്‌മെന്റ് സോണുകളുടെ മേല്‍നോട്ടവും നിയമലംഘനങ്ങളും നോക്കിയിരുന്ന പൊലീസിന് ഇനി ജോലിയും അധികാരവും വര്‍ധിക്കുകയാണ്. ഒരു പ്രദേശത്ത് ഒരാള്‍ രോഗബാധിതനാകുന്ന സമയം മുതല്‍ പൊലീസ് ഇടപെടല്‍ തുടങ്ങുന്നതാണ് പുതിയ നിര്‍ദേശം. രോഗിയുടെ സമ്പര്‍ക്ക പട്ടിക തയാറാക്കലാണ് ആദ്യ ദൗത്യം. ഇതിനായി ഓരോ സ്റ്റേഷനിലും എസ്. ഐ യുടെ നേതൃത്വത്തില്‍ 4 അംഗ സംഘമുണ്ടാകും. ഇവര്‍ രോഗിയെ ഫോണില്‍ വിളിച്ച് 10 ദിവസത്തെ വിവരം ശേഖരിക്കും. രോഗിയുടെ ഫോണ്‍ വിളികളും ടവര്‍ സിഗ്‌നലും പരിശോധിച്ച് സമ്പര്‍ക്കത്തിലേര്‍പ്പെട്ടവരെ കണ്ടെത്തും. 24 മണിക്കൂറിനുള്ളില്‍ ഇത് പൂര്‍ത്തിയാക്കണം. അടുത്ത ദൗത്യം കണ്ടയ്‌മെന്റ് സോണുകളുടെ നിശ്ചയവും പരിപാലനവുമാണ്. രോഗിയും സമ്പര്‍ക്ക പട്ടികയിലുള്ളവരും ഉള്ള സ്ഥലം ചെറിയ മേഖലയായി തിരിച്ച് പൂര്‍ണമായി അടക്കും. അവശ്യ ഭക്ഷണ വസ്തുക്കള്‍ പൊലീസ് എത്തിക്കും. ആരും പുറത്തിറങ്ങുന്നില്ലെന്ന് ഉറപ്പാക്കാന്‍ ബൈക്ക് പട്രോളിങ്ങും പ്രത്യേക ആപ്ലിക്കേഷന്‍ ഉപയോഗിച്ച് മൊബൈല്‍ സിഗ്‌നല്‍ നിരീക്ഷണവും നടത്തും. കണ്ടയ്‌മെന്റ് സോണിന് പുറത്തും വാഹന പരിശോധന ശക്തമാക്കും. ചന്തകള്‍ , ബസ് സ്റ്റാന്റ്, വിവാഹ.. മരണ വീടുകള്‍, ആശുപത്രികള്‍ എന്നിവിടങ്ങളില്‍ ആള്‍ക്കൂട്ടം ഒഴിവാക്കാന്‍ പ്രത്യേക നിരീക്ഷണം ഏര്‍പ്പെടുത്തും. ജില്ലാ പൊലീസ് മേധാവിക്ക് പുറമെ ഒരു ഉന്നത ഉദ്യോഗസ്ഥനെയും ഓരോ ജില്ലക്കായി നിയോഗിച്ചു. ഒരാഴ്ചക്ക് ശേഷം രോഗികളുടെയെണ്ണം കുറഞ്ഞോയെന്ന് നോക്കി പദ്ധതി വിലയിരുത്താനാണ് ഡി.ജി.പിയുടെ നിര്‍ദേശം. ആരോഗ്യ വകുപ്പിന്റെ ജോലിയില്‍ പൊലീസ് എത്തുമ്പോള്‍ അഭിപ്രായ വ്യത്യാസവും ഏകോപനക്കുറവും ഒഴിവാക്കാന്‍ കൂടിയാലോചനകളിലൂടെ ഇന്ന് വൈകിട്ട് മുതലെങ്കിലും പദ്ധതി നടപ്പാക്കാനാണ് തീരുമാനം.