തനി നാടന്‍ സൂപ്പര്‍ ഹീറോ ആയി ഷോര്‍ട്ട് ഫിലിം മരണ മാസ്സ് 3 ശ്രദ്ധേയമാകുന്നു

സൂപ്പര്‍ ഹീറോ കഥകളും സിനിമകളും എന്നും ഇഷ്ടപ്പെടുന്നവരാണ് മലയാളി പ്രേക്ഷകര്‍. ഇന്ത്യന്‍ സിനിമയില്‍ സൂപ്പര്‍ഹീറോ എന്ന താരപരിവേഷം യുവതലമുറയുടെ മനസ്സില്‍ സൃഷ്ടിച്ച ഋതിക് റോഷന്റെ കൃഷ് മുതല്‍ സ്‌പൈഡര്‍ മാനും, സൂപ്പര്‍ മാനും എല്ലാം പ്രേക്ഷകര്‍ക്ക് ഇഷ്ടപ്പെട്ട കഥാപാത്രങ്ങളാണ്. ഇപ്പോഴിതാ തനി നാടന്‍ സൂപ്പര്‍ ഹീറോയുടെ കഥയുമായി എത്തിയിരിക്കുകയാണ് മരണ മാസ്സ് 3 എന്ന ഹ്രസ്വ ചിത്രം. ദേവിദാസ് സംവിധാനം ചെയ്തിരിക്കുന്ന ചിത്രം സദാചാര ഗുണ്ടയിസത്തിനെതിരെ പ്രതികരിക്കുന്ന ദമ്പതിമാരുടെ ജീവിതത്തിലൂടെയാണ് കഥ പറയുന്നത്. ഒരു പ്രശ്‌നം ഉണ്ടാകുമ്പോള്‍ അവരുടെ ജീവിതത്തിലേയ്ക്ക് നാടന്‍ സൂപ്പര്‍ ഹീറോയായ രുദ്രന്‍ കടന്ന് വരുന്നതോടെ ചിത്രം കൂടുതല്‍ മനോഹരമാക്കുന്നുണ്ട്. ഡാര്‍ക്ക് തീമിലുള്ള ഉദ്വേഗം നിറയ്ക്കുന്ന ഫ്രെയ്മുകളും, കഥാപാത്രങ്ങളുടെ പ്രകടനവും ചിത്രത്തെ മികവുറ്റതാക്കുന്നു. 2018ല്‍ ഇറങ്ങിയ മരണ മാസ്സ് 2 എന്ന ഷോര്‍ട്ട് ഫിലിമിന്റെ തുടര്‍ച്ചയായ മരണ മാസ്സ് 3 നിര്‍മ്മിച്ചിരിക്കുന്നത് വിഷ്ണു എസ്സ് നായര്‍ ആണ്.

വിഷ്ണു സുരേഷ്, മിന്റു മരിയ വിന്‍സെന്റ്, വിഷ്ണു ഷാജി, സുനില്‍ കുമാര്‍, ആരതി മുരളീധരന്‍, സജീബ് ഇക്ബാല്‍, അശ്വിന്‍ നായര്‍, പ്രതാപ് ആര്യന്‍, രഞ്ജിത് രജനി, ശ്രുതി സുവര്‍ണ്ണ, പ്രവീണ്‍ നാരായണ്‍ എന്നിവരാണ് പ്രധാന വേഷങ്ങള്‍ അവതരിപ്പിച്ചിരിക്കുന്നത്. ആക്ഷന്‍ കൊറിയോഗ്രാഫി ചെയ്തിരിക്കുന്നത് അക്ഷയ് രവി, വിനീത് വി മോഹന്‍ ഛായാഗ്രഹണവും, സാം സൈമണ്‍ ജോര്‍ജ് പശ്ചാത്തല സംഗീതവും കൈകാര്യം ചെയ്തിരിക്കുന്നു.