പടം പുറത്തിറങ്ങിയപ്പോള്‍ എ സര്‍ട്ടിഫിക്കറ്റ്, പോസ്റ്ററുകളില്‍ ബലാല്‍സംഗ രംഗങ്ങളും

മലയാള സംവിധായകന്റെ മുഖത്തടിച്ച സംഭവം വെളിപ്പെടുത്തി നടി

ഏഴാമിടം, ഗന്ധര്‍വരാത്രി തുടങ്ങിയ മലയാള സിനിമകളിലൂടെ മലയാളി പ്രേക്ഷകര്‍ക്ക് സുപരിചിതയായ നടിയാണ് വിചിത്ര. സൂപ്പര്‍ സ്റ്റാര്‍ രജനികാന്തിനും ഇളയ ദളപതി വിജയ്ക്കുമൊപ്പമെല്ലാം അഭിനയിച്ചിട്ടുള്ള വിചിത്രയ്ക്ക് സിനിമയില്‍ സജീവമായിരുന്ന കാലത്ത് പല പ്രതിസന്ധി ഘട്ടങ്ങളിലൂടെയും കടന്നുപോകേണ്ടി വന്നിട്ടുണ്ട്. ഇപ്പോഴിതാ മലയാള സിനിമാരംഗത്തുനിന്നും തനിക്ക് നേരിടേണ്ടിവന്ന ദുരനുഭവത്തെക്കുറിച്ച് വെളിപ്പെടുത്തിയിരിക്കുകയാണ് നടി.ഒരു തമിഴ് മാധ്യമത്തിന് നല്‍കിയ അഭിമുഖത്തിലാണ് താരം സംഭവം വെളിപ്പെടുത്തിയത്. തമിഴില്‍ നിറഞ്ഞ നില്‍ക്കുന്ന വേളയിലാണ് വിചിത്രയ്ക്ക് മലയാളത്തില്‍ നിന്ന് ഓഫര്‍ വന്നത്. ഷക്കീല സിനിമയില്‍ സജീവമായ കാലമായിരുന്നതിനാല്‍ മലയാളത്തില്‍ അഭിനയിക്കാന്‍ അല്‍പ്പം ആശങ്കയുണ്ടായിരുന്നു. സംവിധായകനോട് ഇക്കാര്യം പങ്കുവയ്ക്കുകയും ചെയ്തു.യാതൊരു മോശം രംഗങ്ങളുമില്ലെന്നും മമ്മൂട്ടിയെ വച്ച് വരെ പടം പിടിച്ച വ്യക്തിയാണ് താന്‍ എന്നുമായിരുന്നു സംവിധായകന്റെ മറുപടി. പരീക്ഷപോലും വേണ്ടെന്ന് വെച്ചാണ് അന്ന് ആ സിനിമ ചെയ്തത്.
എന്നാല്‍ ഒരു മാസത്തിന് ശേഷം സിനിമയുടെ അണിയറ പ്രവര്‍ത്തകര്‍ വീണ്ടും വിളിച്ചു. രണ്ടു രംഗങ്ങള്‍കൂടി ബാക്കിയുണ്ടെന്നും കുളിക്കുന്ന രംഗവും ബലാല്‍സംഗവുമാണ് എന്ന് അറിയിക്കുകയും ചെയ്തു. മോശമായി ചിത്രീകരിക്കില്ലെന്നും സിനിമയ്ക്ക് അഭിവാജ്യമായ രംഗങ്ങളാണിതെന്നും അറിയിച്ചതിനാലാണ് പടം ചെയ്തത്. എന്നാല്‍ പടം പുറത്തിറങ്ങിയപ്പോള്‍ എ സര്‍ട്ടിഫിക്കറ്റ് ആയിരുന്നുവെന്നും പോസ്റ്ററുകളില്‍ ബലാല്‍സംഗ രംഗങ്ങളും ഉള്‍പ്പെടുത്തിയിരുന്നുവെന്നും വിചിത്ര പറയുന്നു. അപ്പോള്‍ സങ്കടത്തേക്കാളേറെ ദേഷ്യമാണ് വന്നത്. ഞാന്‍ വഞ്ചിക്കപ്പെട്ടതുപോലെ തോന്നി. ഉടനെ സംവിധായകനെ കാണാന്‍ പോയി. ആദ്യം തന്നെ മുഖത്തടിച്ചുകൊണ്ടാണ് പ്രതികരിച്ചത്. പിന്നീട് ഇത്തരത്തില്‍ വഞ്ചിക്കരുതെന്ന് പറഞ്ഞ് പോരുകയായിരുന്നുവെന്നും വിചിത്ര പറയുന്നു.
തമിഴ് സിനിമയിലാണ് വിചിത്ര കൂടുതല്‍ അഭിനയിച്ചിരുന്നത്. മലയാളം, കന്നഡ, തെലുങ്ക് ചിത്രങ്ങളിലും സാന്നിധ്യം അറിയിച്ചിട്ടുണ്ട്.