ഇടയ്ക്കിടെ മുഖം കഴുകുന്ന ശീലമുണ്ടെങ്കിൽ..!!

നിങ്ങൾക്ക് ഇടയ്ക്കിടെ മുഖം കഴുകുന്ന ശീലമുണ്ടോ? മുഖത്തെ എണ്ണമയവും അഴുക്കുകളും നീക്കാൻ ഇടയ്ക്കിടെ മുഖം കഴുകണമെന്നാണ് നിങ്ങൾ വിചാരിച്ചു വച്ചിരിക്കുന്നതെങ്കിൽ അത് തെറ്റാണ്. തുടർച്ചയായുള്ള മുഖം കഴുകൽ പലപ്പോഴും ഗുണത്തേക്കാളേറെ ദോഷമായിരിക്കും ചെയ്യുക.

ഇടയ്ക്കിടയ്ക്ക് മുഖം കഴുകുന്നത് മുഖത്തെ സ്വാഭാവിക എണ്ണമയം ഇല്ലാതാക്കുകയും ചര്‍മം വരണ്ടതാക്കുകയും ചെയ്യും. ദിവസേന രാവിലെയും വൈകിട്ടും മാത്രം മുഖം കഴുകുന്നതാണ് നല്ലത്.

രാവിലെ ഉറക്കമുണര്‍ന്ന് എഴുന്നേറ്റ് മുഖം കഴുകുന്നത് ത്വക്കിന് കൂടുതല്‍ ഫ്രഷ്‌നസ്സ് നൽകും. ത്വക്കിന്റെ നിര്‍ജ്ജീവമായ സെല്ലുകളെ അത് നിര്‍മ്മാര്‍ജ്ജനം ചെയ്യും. ഒരു ദിവസം മുഴുവനുമുള്ള പലതരം അഴുക്കുകള്‍ നീക്കം ചെയ്യാനാണ് വൈകുന്നേരമോ രാത്രിയിലോ മുഖം കഴുകുന്നത്.

ഇത് കൂടാതെ ശാരീരികമായി കൂടുതല്‍ അധ്വാനം വേണ്ടിവരുന്ന സാഹചര്യങ്ങളിലോ അമിതമായി വിയര്‍ക്കുന്ന സമയത്തോ മുഖം കഴുകാം. എണ്ണമയം കൂടുതലുള്ളവര്‍ ചെറു ചൂടു വെള്ളത്തിലാണ് കഴുകേണ്ടത്.അതുപോലെ തണുത്ത വെള്ളമുപയോഗിച്ച് മുഖം കഴുകുന്നത് നല്ല ഉണര്‍വ് നല്‍കും.