കറുത്ത കുര്‍ത്തയില്‍ മീശ പിരിച്ച് മമ്മൂക്കയും സ്യൂട്ടണിഞ്ഞ് ലാലേട്ടനും

ഇന്നലെ വെള്ളമുണ്ടും വെള്ള ജുബ്ബയണിഞ്ഞ് താടി നീട്ടിയ ലുക്കില്‍ എത്തി. ഇന്നിതാ കറുത്ത വസ്ത്രം ധരിച്ച് സ്‌റ്റൈലില്‍ മീശ പിരിച്ച് മമ്മൂട്ടി. സമൂഹമാധ്യമങ്ങളില്‍ പതിവ് തെറ്റാതെ ഈ ലുക്കും വൈറലാവുകയാണ്. നിര്‍മാതാവ് ആന്റണി പെരുമ്പാവൂരിന്റെ മകളുടെ വിവാഹ വിരുന്നിനെത്തിയതാണ് മമ്മൂട്ടി. മീശ പിരിച്ച് കറുത്ത കുര്‍ത്തയണിഞ്ഞെത്തിയ താരത്തിനൊപ്പം എത്തിയ നിര്‍മാതാവ് ആന്റോ ജോസഫും കറുത്ത ഷര്‍ട്ട് തന്നെയാണ് ധരിച്ചത്. സ്ഥിരമായി വെള്ള വസ്ത്രം ധരിക്കുന്നയാളാണ് ആന്റോ ജോസഫ്. വിവാഹവിരുന്നിനെത്തിയ മമ്മൂട്ടി മോഹന്‍ലാലിനൊപ്പം നില്‍ക്കുന്ന ചിത്രം വൈറലാണ്. മോഹന്‍ലാലും കറുത്ത സ്യൂട്ടണിഞ്ഞാണ് ചടങ്ങിനെത്തിയത്.
ഇന്നലെയാണ് ആന്റണി പെരുമ്പാവൂരിന്റെ മകളും ഡോക്ടറുമായ അനിഷയും പെരുമ്പാവൂര്‍ ചക്കിയത്ത് ഡോ വിന്‍സന്റിന്റെയും സിന്ധുവിന്റെയും മകനായ ഡോക്ടര്‍ എമിലും തമ്മിലുള്ള വിവാഹം നടന്നത്. പള്ളിയില്‍ നടന്ന ചടങ്ങിലും പിന്നീട് നടന്ന റിസപ്ഷനിലും ആദ്യാവസാനം വരെ മോഹന്‍ലാല്‍ പങ്കെടുത്തു. ഇന്നാണ് സിനിമ പ്രവര്‍ത്തകര്‍ക്കായുള്ള വിരുന്ന് ഒരുക്കിയിരിക്കുന്നത്. നവംബര്‍ 29ന് ആയിരുന്നു എമിലിന്റെയും അനിഷയുടെയും വിവാഹനിശ്ചയം. എമിലിന്റെ അമ്മ സിന്ധു പാലാ മുന്‍സിപ്പല്‍ ചെയര്‍മാന്‍ ആയിരുന്ന പരേതനായ ജോസ് പടിഞ്ഞാറേക്കരയുടെ മകളാണ്.പൂമുഖപ്പടിയില്‍ നിന്നെയും കാത്ത് എന്ന ചിത്രത്തിന്റെ നിര്‍മാതാവു കൂടിയാണ് അദ്ദേഹം.