വീരപ്പനെക്കുറിച്ചുള്ള വെബ് സീരിസിനെതിരെ ഭാര്യ; ഹൈക്കോടതിയുടെ വിലക്ക്

വീരപ്പനെ കുറിച്ചുള്ള വെബ് സീരീസിന് കര്‍ണാടക ഹൈക്കോടതിയുടെ വിലക്ക്. വീരപ്പന്‍: ഹങ്കര്‍ ഫോര്‍ കില്ലിങ് എന്ന പേരില്‍ എഎംആര്‍ പിക്‌ചേഴ്‌സ് ഒരുക്കുന്ന സീരീസാണ് കോടതി താത്കാലികമായി തടഞ്ഞുവച്ചത്. വീരപ്പന്റെ ഭാര്യ മുത്തുലക്ഷ്മി കോടതിയെ സമീപിച്ചതിനെ തുടര്‍ന്നാണ് നടപടി. വ്യാജ വിവരങ്ങളും കെട്ടുകഥകളും വച്ച് വീരപ്പനെ മോശമായി ചിത്രീകരിച്ചാണ് സീരീസ് ഒരുക്കിയിരിക്കുന്നതെന്ന് മുത്തുലക്ഷ്മി പരാതിയില്‍ പറയുന്നു.
തന്റെ ഭര്‍ത്താവ് കൊല്ലപ്പെട്ടിട്ട് 16 വര്‍ഷമായെന്നും ഇതിനിടെ പലരും വീരപ്പനെ കുറിച്ച് സിനിമയെടുത്ത് പണം സമ്പാദിക്കുകയും തങ്ങളുടെ കുടുംബത്തെ അപമാനിക്കുകയും ചെയ്തിട്ടുണ്ടെന്നും മുത്തുലക്ഷ്മി പറഞ്ഞു. മുന്‍പ് വീരപ്പനെ കുറിച്ചുള്ള സിനിമയ്‌ക്കെതിരെ സുപ്രീംകോടതിയെ വരെ സമീപിച്ചിട്ടുണ്ടെന്നും അന്ന് സിനിമ പൂര്‍ത്തിയാക്കിയെന്ന കാരണം കൊണ്ട് അനുമതി നല്‍കുകയാണുണ്ടായതെന്നും മുത്തുലക്ഷ്മി പറഞ്ഞു.25 ലക്ഷം രൂപ നഷ്ടപരിഹാരമാണ് എനിക്ക് നല്‍കിയത്. സിനിമ വിലക്കാന്‍ സാധിച്ചില്ല. എന്നാല്‍ വീണ്ടും ഇത് ആവര്‍ത്തിക്കുന്നതിലൂടെ തന്റെ വ്യക്തി ജീവിതത്തിലേക്കുള്ള കടന്നു കയറ്റവും ലംഘനവുമാകുമെന്നും മുത്തുലക്ഷ്മി പറയുന്നു.