മഞ്ജു വാര്യര്‍ നിര്‍മിക്കുന്ന ആദ്യ കൊമേര്‍ഷ്യല്‍ ചിത്രം ‘ലളിതം സുന്ദരം’ ; ചിത്രം പങ്കുവച്ച് മഞ്ജു വാര്യര്‍

മഞ്ജു വാര്യരുടെ സഹോദരനായ മധുവാര്യര്‍ സംവിധാനം ചെയ്യുന്ന ആദ്യ ചിത്രമാണ് 'ലളിതം സുന്ദരം'. ചിത്രീകരണ സമയത്തുള്ള ധാരാളം ചിത്രം മഞ്ജു ഇതിന് മുന്നേ പങ്കുവെച്ചിട്ടുണ്ടായിരുന്നു. കോവിഡ് വ്യാപനത്തിന്റെ പശ്ചാത്തലത്തില്‍ നിര്‍ത്തിവച്ച ചിത്രീകരണം വീണ്ടും ആരംഭിച്ചിരിക്കുകയാണ്. ഇപ്പോള്‍ സിനിമയുടെ ലൊക്കേഷനില്‍ നിന്നുള്ള ഒരു ചിത്രമാണ് മഞ്ജു സോഷ്യല്‍ മീഡിയയില്‍ പങ്കുവച്ചിരിക്കുന്നത്.'ഇതാണ് ഞങ്ങള്‍' എന്ന അടിക്കുറിപ്പോടെ തന്റെ സഹോദരനും ചിത്രത്തിന്റെ സംവിധായകനുമായ മധു വാര്യര്‍, തിരക്കഥാകൃത്ത് രഘുനാഥ് പലേരി, നടന്മാരായ ബിജു മേനോന്‍, സൈജു കുറുപ്പ്, അനു മോഹന്‍, നടി ദീപ്തി സതി, ചിത്രത്തിലെ ബാലതാരങ്ങള്‍ എന്നിവര്‍ക്കൊപ്പമുള്ള ഫൊട്ടോയാണ് മഞ്ജു പങ്കുവച്ചിരിക്കുന്നത്.
ബിജുമേനോനും മഞ്ജു വാര്യരുമാണ് 'ലളിതം സുന്ദരം' എന്ന ചിത്രത്തില്‍ കേന്ദ്ര കഥാപാത്രങ്ങളെ അവതരിപ്പിക്കുന്നത്. സെഞ്ചുറിയുടെ സഹകരണത്തോടെ മഞ്ജു വാര്യര്‍ നിര്‍മിക്കുന്ന ആദ്യ കൊമേര്‍ഷ്യല്‍ ചിത്രം കൂടിയാണ് 'ലളിതം സുന്ദരം'. മഞ്ജു വാര്യര്‍ പ്രൊഡക്ഷന്‍സിന്റെ ബാനറിലാണ് ചിത്രം നിര്‍മിക്കുന്നത്. വണ്ടിപ്പെരിയാറുള്ള മൗണ്ട് ബംഗ്ലാവിലായിരുന്നു ചിത്രത്തിന് തുടക്കം കുറിച്ചത്. പി സുകുമാര്‍ ചിത്രത്തിന്റെ ഛായാഗ്രഹണവും പ്രമോദ് മോഹന്‍ തിരക്കഥയും ഒരുക്കുന്നു. ബിജിബാലാണ് സംഗീതം ഒരുക്കുന്നത്. ചിത്രത്തില്‍ ദിലീഷ് പോത്തന്‍, സൈജു കുറുപ്പ്, സറീന വഹാബ്, ദീപ്തി സതി എന്നിവരും പ്രധാന കഥാപാത്രങ്ങളെ അവതരിപ്പിക്കുന്നുണ്ട്.