ആലപ്പി രങ്കനാഥൻ മാസ്റ്ററുടെ “ഗുരുരത്നപഞ്ചകം” പ്രകാശനം ചെയ്തു

കോട്ടയം: സംഗീത സംവിധായകനും ഗാനരചയിതാവുമായ ആലപ്പി രങ്കനാഥൻ മാസ്റ്റർ രചിച്ച 'ഗുരുരത്നപഞ്ചകം' കൃതികൾ, കലാഭാരതിയുടെ നേതൃത്വത്തിൽ പ്രകാശനം നടത്തി. തിരുനക്കര സ്വാമിയാർ മഠം ഓഡിറ്റോറിയത്തിൽ നാഗസ്വര വിദ്വാൻ തിരുവിഴാ ജയശങ്കർ ചടങ്ങ് ഉദ്ഘാടനം ചെയ്തു. സംഗീത സംവിധായകനും സംഗീതജ്ഞനുമായ കെ.ജി ജയൻ ആർട്ടിസ്റ്റ് സുജാതന് ഗുരുരത്നപഞ്ചക കൃതി നൽകികൊണ്ട് പ്രകാശനം ചെയ്തു. കർണ്ണാടക സംഗീത ലോകത്തിന്‌ അമൂല്യ സംഭാവനയായ മഹത് സൃഷ്ടിയാണ് രങ്കനാഥൻ മാസ്റ്ററുടെ ഗുരുരത്നപഞ്ചകമെന്ന് വീഡിയോ സന്ദേശത്തിൽ കൂടി ഗാനഗന്ധർവ്വൻ കെ ജെ യേശുദാസ് പറഞ്ഞു.

കർണാടക സംഗീത പിതാമഹന്മാരായി ആദരിക്കപ്പെടുന്ന പുരന്തരദാസർ, ത്യാഗരാജ സ്വാമികൾ, മുത്തുസ്വാമി ദീക്ഷിതർ, ശ്യാമശാസ്ത്രികൾ, സ്വാതിതിരുനാൾ എന്നിവരെ പ്രകീർത്തിച്ചുകൊണ്ട് ആലപ്പി രങ്കനാഥൻ മാസ്റ്റർ രചിച്ച ഗുരുരത്നപഞ്ചകം കർണാടക സംഗീതലോകത്തിന് ലഭിച്ച മികച്ച സംഭവനയാണെന്ന് ചടങ്ങിൽ പങ്കെടുത്ത പ്രശസ്തർ അഭിപ്രായപ്പെട്ടു. പിന്നണി ഗായകൻ കെ എസ് ബിനു ആനന്ദ്‌ ആലപിച്ച ഗുരുരത്നപഞ്ചകം ചടങ്ങിൽ പ്രദർശിപ്പിച്ചു. പ്രൊഫ. പൊൻകുന്നം രാമചന്ദ്രൻ സ്വിച്ച്ഓൺ കർമ്മം നിർവഹിച്ചു.

കലാഭാരതി വർക്കിംഗ് പ്രസിഡണ്ട്‌ പി.ജി ഗോപാലകൃഷ്ണൻ ചടങ്ങിൽ അധ്യക്ഷത വഹിച്ചു. സംഗീതജ്ഞ മാതംഗി സത്യമൂർത്തി, വയലിനിസ്റ്റ് നെടുമങ്ങാട് ശിവാനന്ദൻ, ഗായിക വൈക്കം വിജയലക്ഷ്മി, എസ് ജയചന്ദ്രൻ നാദോപാസന, എൻ ശ്രീനിവാസൻ തപസ്യ, വാസുദേവൻ നമ്പൂതിരി രഞ്ജിനി, കലാമണ്ഡലം ദേവകി അന്തർജ്ജനം, പൊതിയിൽ നാരായണചാക്യാർ, പി ചന്ദ്രകുമാർ, കലാഭാരതി ജനറൽ സെക്രട്ടറി ജോജോ തോമസ്, ട്രഷറർ കെ പി ജോസ് എന്നിവർ പ്രസംഗിച്ചു. ആലപ്പി രങ്കനാഥൻ മാസ്റ്റർ മറുപടി പ്രസംഗവും നടത്തി.