‘മുഖ്യമന്ത്രി ആരെയും അപമാനിച്ചിട്ടില്ല, അവാര്‍ഡ് ജേതാക്കള്‍ക്ക് പരാതിയില്ല’; വിവാദം അനാവശ്യമെന്ന് എ കെ ബാലന്‍

സംസ്ഥാന ചലച്ചിത്ര അവാര്‍ഡ് വിതരണത്തെ തുടര്‍ന്നുണ്ടായ വിവാദം അനാവശ്യമെന്ന് സാംസ്‌കാരിക വകുപ്പ് മന്ത്രി എ കെ ബാലന്‍. അവാര്‍ഡ് ദാന ചടങ്ങ് നടത്തുന്നത് കൊവിഡ് പ്രോട്ടോക്കോള്‍ പാലിച്ചായിരിക്കുമെന്ന് നേരത്തെ അറിയിച്ചിരുന്നു. മുഖ്യമന്ത്രി അവാര്‍ഡുകള്‍ കയ്യില്‍ കൊടുക്കാഞ്ഞത് നല്ല ഉദ്ദേശത്തോടെയാണ്. മറിച്ച് ജേതാക്കളെ അപമാനിക്കാന്‍ മുഖ്യമന്ത്രി ശ്രമിച്ചിട്ടില്ല. പുരസ്‌കാരം കയ്യില്‍ നല്‍കാത്തതിന് ഒരു ജേതാക്കളും ഇതുവരെ പരാതി പറഞ്ഞിട്ടില്ല. നിര്‍മ്മാതാവ് സുരേഷ് കുമാറിന്റെ വിമര്‍ശനം രാഷ്ട്രീയ കാരണത്താലാണെന്നും മന്ത്രി വ്യക്തമാക്കി.
ജനുവരി 30നാണ് ചലച്ചിത്ര പുരസ്‌കാരങ്ങള്‍ വിതരണം ചെയ്തത്. കൊവിഡ് വ്യാപനത്തെ തുടര്‍ന്ന് മുഖ്യമന്ത്രി ജേതാക്കള്‍ക്ക് പുരസ്‌കാരം കൈമാറിയിരുന്നില്ല. മേശപ്പുറത്ത് വെച്ച പുരസ്‌കാരങ്ങള്‍ ജേതാക്കള്‍ സ്വയം എടുക്കുകയായിരുന്നു. ഇതേ തുടര്‍ന്ന് നിര്‍മ്മാതാവ് സുരേഷ് കുമാറടക്കം സിനിമ മേഖലയിലെ നിരവധി പേര്‍ വിമര്‍ശനവുമായി രംഗത്തെത്തിയിരുന്നു. ജേതാക്കളെ അപാനിക്കുന്ന രീതിയിലുള്ള പ്രവൃത്തിയാണ് നടന്നത്. ഇതിലും ഭേദം പുരസ്‌കാരങ്ങള്‍ വീട്ടിലെത്തിച്ച് നല്‍കുന്നതായിരുന്നു നല്ലതെന്നും വിമര്‍ശനം ഉയര്‍ന്നു.
അതേസമയം മികച്ച നടിക്കുള്ള പുരസ്‌കാരം ലഭിച്ച കനി കുസൃതി അവാര്‍ഡ് കയ്യില്‍ തരാതെയുള്ള ചടങ്ങ് പ്രശംസനീയമാണെന്നാണ് പ്രതികരിച്ചത്. കൊവിഡ് തുടരുന്ന സാഹചര്യത്തില്‍ പുരസ്‌കാരങ്ങള്‍ കയ്യില്‍ തരാത്തത് പ്രശംസനീയമാണ്. അതൊരിക്കലും തെറ്റല്ല മറിച്ച് മാതൃകയാണെന്നാണ് കനി പറഞ്ഞത്. അവാര്‍ഡുകള്‍ സ്വീകരിക്കുന്നവര്‍ക്ക് അത് പ്രധാനപ്പെട്ടതാണ് എന്നതു പോലെ തന്നെ മറ്റുള്ള സാധാരണക്കാര്‍ക്ക് അവരുടെ വീട്ടിലെ വിവാഹവും മറ്റു ചടങ്ങുകളും പ്രധാനപ്പെട്ടതാണ്. അവരോടെല്ലാം കൊവിഡ് മാനദണ്ഡങ്ങള്‍ പാലിക്കണം എന്ന് നിര്‍ദേശം കൊടുത്തിട്ട് സര്‍ക്കാര്‍ ഇത്തരത്തില്‍ ചടങ്ങുകള്‍ നടത്തുമ്പോള്‍ അവിടെ കൊവിഡ് മാനദണ്ഡങ്ങള്‍ പാലിക്കാതിരിക്കുന്നത് നിരുത്തരവാദപരമാണ്. അവിടെ ഒത്തുകൂടിയവര്‍ക്ക് രോഗബാധ ഉണ്ടായാല്‍ അത് തിരുത്താന്‍ പറ്റാത്ത തെറ്റാകും. പൊതു പ്രവര്‍ത്തകരും താരങ്ങളും സമൂഹത്തില്‍ മാതൃക കാണിക്കേണ്ടവരാണെന്നും കനി കൂട്ടിച്ചേര്‍ത്തു.
സംസ്ഥാന ചലച്ചിത്ര പുരസ്‌കാരങ്ങളുടെയും ജെസി ഡാനിയല്‍ പുരസ്‌കാരത്തിന്റെയും വിതരണം തിരുവനന്തപുരത്ത് വെച്ചാണ് നടന്നത്. ചടങ്ങില്‍ അവാര്‍ഡ് ജേതാക്കള്‍ക്കും ക്ഷണിതാക്കള്‍ക്കും മാത്രമായിരുന്നു പ്രവേശനാനുമതി. മന്ത്രി എ കെ ബാലന്റെ അധ്യക്ഷതയില്‍ നടന്ന ചടങ്ങ് മുഖ്യമന്ത്രി പിണറായി വിജയനാണ് ഉദ്ഘാടനം ചെയ്തത്.
ആഡ്രോയിഡ് കുഞ്ഞപ്പന്‍, വികൃതി എന്നീ ചിത്രങ്ങളിലെ പ്രകടനത്തിന് സുരാജ് വെഞ്ഞാറംമൂടിന് മികച്ച നടനുമുള്ള പുരസ്‌കാരം ലഭിച്ചു. ജെല്ലിക്കെട്ടിന് ലിജോ ജോസ് പെല്ലിശ്ശേരിക്കായിരുന്നു മികച്ച സംവിധായകനുള്ള പുരസ്‌കാരം. മികച്ച അഭിനയത്തിന് പ്രത്യേക ജൂറി പരാമര്‍ശം നേടിയ നിവിന്‍ പോളി, അന്ന ബെന്‍, പ്രിയംവദ എന്നിവരും പുരസ്‌കാരം ഏറ്റുവാങ്ങി.
മികച്ച സ്വഭാവ നടനുള്ള പുരസ്‌കാരം ഫഹദ് ഫാസിലിനു വേണ്ടി തിരക്കഥാകൃത്ത് ശ്യാം പുഷ്‌ക്കരനാണ് ഏറ്റു വാങ്ങിയത്. ഛായാഗ്രാഹകനും സംവിധായകനുമായ മധു അമ്പാട്ട് അധ്യക്ഷനായ ജൂറിയാണ് വിധി നിര്‍ണയം നടത്തിയത്. 119 സിനിമകളാണ് ഇത്തവണ അവാര്‍ഡിനായി മത്സരിച്ചത്.