ലൊട്ടുലൊടുക്ക് പ്രദീപ് കോട്ടയം, സലീം കുമാര്‍ ഗുല്‍ഗുലുമാലും; അജു വര്‍ഗ്ഗീസാണോ മായാവിയെന്ന് പ്രേക്ഷകര്‍

സമൂഹമാധ്യമത്തില്‍ തരംഗമായ മായാവി സീരീസില്‍ പുതിയ കഥപാത്രങ്ങളെത്തി. മായാവി ചിത്രക്കഥയിലെ ബോബും തോക്കും നിര്‍മ്മിക്കുന്ന ലൊട്ടുലൊടുക്കും, ഗുല്‍ഗുലുമാണ് പുതിയ കഥാപാത്രങ്ങള്‍. നടന്‍ പ്രദീപ് കോട്ടയമാണ് ലൊട്ടുലൊടുക്ക്. ഗുല്‍ഗുലുമാല്‍ സലീം കുമാറും. രണ്ട് ദിവസം മുമ്പ് ലൊട്ടുലൊടുക്കും ഗുല്‍ഗുലുമാലും ഉടനെത്തുമെന്ന പ്രൊമോ വീഡിയോയും ആര്‍ട്ട് ഓഫ് അനൂപ് എന്ന ഇന്‍സ്റ്റഗ്രാം അക്കൗണ്ടില്‍ വന്നിരുന്നു. ലൊട്ടുലൊടുക്കിന്റെയും ഗുല്‍ഗുലുമാലിന്റെയും സ്ഥിരം ഡയലോഗായ ‘തോക്കും ബോംബും ഉണ്ടാക്കുമ്പോ പൊട്ടിത്തെറി ഒക്കെ സ്വാഭാഭാവികം’ എന്നും പ്രൊമോയില്‍ ഉള്‍പ്പെടുത്തിയിട്ടുണ്ട്.

ലൊട്ടുലൊടുക്കായ പ്രദീപ് കോട്ടയമാണ് ആദ്യമെത്തിയത്. അതിന് ശേഷം ആരായിരിക്കും ഗുല്‍ഗുലുമാല്‍ എന്ന് പ്രേക്ഷകരോട് ചോദിക്കുന്ന പോസ്റ്ററും വന്നിരുന്നു. പലരും സലീം കുമാറായിരിക്കും ഗുല്‍ഗുലുമെന്ന് നേരത്തെ പ്രവചിച്ചിരുന്നു. ഇപ്പോഴത്തെ പോസ്റ്റിന് താഴെ രാജു, രാധ, മായാവി എന്നിവര്‍ ആരാകണം എന്ന് പ്രേക്ഷകര്‍ കമന്റ് ചെയ്യുന്നുണ്ട്. അജു വര്‍ഗ്ഗീസാണോ മായാവി എന്ന് പലരും ചോദിക്കുന്നുണ്ട്. എല്ലാവരും മായാവിക്കായാണ് ആകാംഷയോടെ കാത്തിരിക്കുന്നത്. ഇതിന് മുമ്പ് പുറത്തുവന്നത് പുട്ടാലു, ലുട്ടാപ്പി, ഡാകിനി, കുട്ടൂസന്‍, വിക്രമന്‍, മുത്തു എന്നീ കഥാപാത്രങ്ങളാണ്. ചെമ്പന്‍ വിനോദായിരുന്നു പുട്ടാലു. ബിജുകുട്ടനായിരുന്നു ലുട്ടാപ്പി. പിഷാരടി മുത്തുവും, ഷമ്മി തിലകന്‍ വിക്രമനും. മാമുക്കോയ കുട്ടൂസനായപ്പോള്‍ ഫിലോമിന ഡാകിനിയായെത്തി.

അനൂപ് വേലായുധന്‍ എന്ന കലാകാരനാണ് മായാവി സീരീസിന്റെ നിര്‍മ്മാതാവ്. മലയാള സിനിമയിലെ പ്രമുഖ നടീ നടന്‍മാരെ മായാവി ചിത്രകഥയിലെ കഥാപാത്രങ്ങളാക്കി മാറ്റുകയാണ് ഈ സീരീസിലൂടെ അനൂപ. ആര്‍ട്ട് ഓഫ് അനൂപ് എന്ന തന്റെ ഇന്‍സ്റ്റഗ്രാം പേജിലാണ് വരച്ച ഡിജിറ്റല്‍ ചിത്രങ്ങള്‍ അനൂപ് പോസ്റ്റ് ചെയ്യുന്നത്. സീരീസ് കൂടുതല്‍ ആളുകളിലേക്ക് എത്തുന്നതിന് വേണ്ടിയാണ് മലയാളികള്‍ക്ക് സുപരിചിതമായ മുഖങ്ങള്‍ ഉപയോഗിക്കുന്നതെന്ന് ഇന്ത്യന്‍ എക്‌സപ്രെസിന് നല്‍കിയ അഭിമുഖത്തില്‍ അനൂപ് പറഞ്ഞിരുന്നു.

ലൊട്ടുലൊടുക്കായി പ്രദീപ് കോട്ടയം

ഗുല്‍ഗുലുമാലായി സലീം കുമാര്‍

പുട്ടാലുവായി ചെമ്പന്‍ വിനോദ്

ലുട്ടാപ്പിയായി ബിജു കുട്ടന്‍

മാമുക്കോയ കുട്ടൂസന്‍

ഫിലോമിന ഡാകിനി

വിക്രമന്‍ ഷമ്മി തിലകന്‍, പിഷാരടി മുത്തു