‘ഉടന്‍ ഭരണത്തിലേക്ക്’; പുതിയ പോസ്റ്ററുമായി മമ്മൂട്ടി

മമ്മൂട്ടി കേരള മുഖ്യമന്ത്രിയായി അഭിനയിക്കുന്ന ചിത്രം വണ്ണിന്റെ പുതിയ പോസ്റ്റര്‍ എത്തി. മമ്മൂട്ടിയുടെ ഫേസ്ബുക്ക് പേജിലൂടെയാണ് പോസ്റ്റര്‍ റിലീസ് ചെയ്തത്. ചിത്രത്തിന്റെ അണിയറപ്രവര്‍ത്തകരും പോസ്റ്റര്‍ പങ്കുവെച്ചിട്ടുണ്ട്. മമ്മൂട്ടിയുടെ കഥാപാത്രം നിമിഷ സജയനെ നെഞ്ചോട് ചേര്‍ത്തു നിര്‍ത്തി സമാധാനിപ്പിക്കുന്നതാണ് പോസ്റ്ററിലുള്ളത്. 'ഉടന്‍ ഭരണത്തിലേക്ക്' എന്ന കുറിപ്പോടെയാണ് വണ്ണിന്റെ ഒഫീഷ്യല്‍ ഫേസ്ബുക്ക് പേജില്‍ പോസ്റ്റര്‍ പങ്കുവെച്ചിരിക്കുന്നത്.
മമ്മൂട്ടി ആദ്യമായി മുഖ്യമന്ത്രി വേഷത്തില്‍ എത്തുന്ന മലയാളം ചിത്രമാണ് വണ്‍. സന്തോഷ് വിശ്വനാഥ് സംവിധാനം ചെയ്ത ചിത്രത്തിന്റെ തിരക്കഥ ബോബി സഞ്ജയ്യാണ് നിര്‍വ്വഹിച്ചത്. കടക്കല്‍ ചന്ദ്രന്‍ എന്നാണ് ചിത്രത്തിലെ മമ്മുട്ടിയുടെ കഥാപാത്രത്തിന്റെ പേര്. മുരളി ഗോപി, ജോജു ജോര്‍ജ്, നിമിഷ സജയന്‍ എന്നിവരാണ് മറ്റ് പ്രധാന കഥാപാത്രങ്ങള്‍. ഗോപി സുന്ദര്‍ സംഗീത സംവിധാനം ചെയ്ത ചിത്രത്തിന്റെ ഛായാഗ്രഹണം വൈദി സോമസുന്ദരമാണ് നിര്‍വ്വഹിച്ചത്.
അതേസമയം അമല്‍ നീരദ് സംവിധാനം ചെയ്യുന്ന ഭീഷ്മപര്‍വ്വം എന്ന സിനിമയിലാണ് മമ്മൂട്ടി ഇപ്പോള്‍ അഭിനയിക്കുന്നത്. നവാഗതയായ രത്തീന ഷര്‍ഷദിന്റെ ചിത്രത്തിലും മമ്മൂട്ടിയാണ് നായകന്‍. ചിത്രത്തിന്റെ പ്രീ പ്രൊഡക്ഷന്‍ പരിപാടികള്‍ ആരംഭിച്ചു എന്നാണ് റിപ്പോര്‍ട്ടുകള്‍. അമല്‍ നീരദ്, രത്തീന എന്നിവരുടെ ചിത്രങ്ങള്‍ക്ക് ശേഷം 'സേതുരാമയ്യര്‍ സിബിഐ'യുടെ അഞ്ചാം ഭാഗത്തിന്റെ ചത്രീകരണം ആരംഭിക്കും.